व्यथा

गेले निघून सारे, का मीच थांबलो होतो?
आशेत पावसाच्या, उन्हात पोळलो होतो

आताच का सुखांनी, हा डाव खेळला ऐसा
आताच आसवांना, हरवून बैसलो होतो

स्वप्नात कोणता जो, आलाप लावला होता
जागेपणी तयाला, गोंगाट बोललो होतो

इतकेच आरशाला, माझे ग सांगणे होते
पाणावताच दाखव, जे काल हासलो होतो

आले तसेच गेले, वस्तूंत साठले हासू
जगणे सुधारताना, जगणेच विसरलो होतो

गाडून टाकली मी, प्रेते जुनाट नात्यांची
जे मोक्षले कधी ना, त्यांनी झपाटलो होतो

–
अक्षरगणवृत्तात लिहिण्याचा हा पहिलाच प्रयत्न! सूचनांचे स्वागतच आहे.
गण: ताराप राधिका मानावा जनास मानावा
सूट: एका गुरु अक्षराऐवजी एकाच शब्दात सलग येणारी दोन लघु अक्षरे