अद्याप परतला नाही पक्षी घरट्याशी

वारा येतो घेऊन धुळीची आवर्ते
पाचोळा धरतो फेर नदीच्या काठाशी
क्षितिजावर गर्दी निळ्याजांभळ्या मेघांची
अन... अद्याप परतला नाही पक्षी घरट्याशी

काळोख उतरतो फांद्याफांद्यांतून जसा
सावली लांबते झाडाची वेशीपाशी
दिवटीला विझत्या एक मिळेना आडोसा
अन... अद्याप परतला नाही पक्षी घरट्याशी

भवताल पेरतो बीज भयाचे कुठेतरी
उठतात कंपने खोल मनाच्या गाभारी
नजरेला होती सर्व दिशा धूसर धूसर
अन... अद्याप परतला नाही पक्षी घरट्याशी

पक्ष्याला ठाऊक परतीच्या साऱ्या वाटा
पक्ष्याला ठाऊक नाते त्याचे गगनाशी
पक्ष्याला कळते घरट्याची वेडी माया
पण... अद्याप परतला नाही पक्षी घरट्याशी

द्वैत