एकमेकांना नव्याने भेटतो दोघे कधी

Submitted by द्वैत on 11 December, 2022 - 06:05

एकमेकांशी मुक्याने बोलतो दोघे कधी
एकमेकांना नव्याने भेटतो दोघे कधी

मी असा नाही जसा मी, ती कुठे आता तशी
शून्य डोळ्यांनी स्वताला शोधतो दोघे कधी

चेहऱ्यावर चेहरे लावू किती काढू किती
ओळखीच्या चेहऱ्यांना टाळतो दोघे कधी

रोजच्या वाटेवरी ह्या धावताना का असे
नेमके एकाचवेळी थांबतो दोघे कधी

दोन काठांच्या कडेने केवढे आलो पुढे
राहिला जो पूल मागे पाहतो दोघे कधी

आठवांच्या दीपपंक्ती लावुनी दारापुढे
सावल्यांच्या सोबतीने जागतो दोघे कधी

द्वैत

विषय: 
काव्यलेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा