शशक पूर्ण करा -ब्रह्मांड - जाई.

काहीच सुचत नाहीय. सगळीकडे फक्त अंधारच अंधार. कानावर फक्त पाण्याचा आवाज पडतोय. मनाला एक अनामिक हुरहूर लागून राहिलीय. तेवढ्यात दरवाजा उघडला जातो.
फोन घेऊन आई येतेय. फोनवर दुसऱ्या बाजूला बाबा असणार हे नक्की. मी त्या दोघांना अजून कस टाळू त्या पेचात. फुलपाखरं पोटात उसेन बोल्टच्या वेगाने दौडतायेत, हात पाय थरथरतायेत.पण आई ठाण मांडून बसल्याने पर्यायही नाहीये.
आता फायरफॉक्सच्या गोल फिरण्याऱ्या वेटोळ्यात ब्रह्मांड फिरताना दिसू लागलंय. दोन सेकंदात काय ते कळणार आहेच. पण आईच्या स्निग्ध स्पर्शाने डोळे उघडले गेलेत.स्क्रीनवर Pass असा मेसेज आणि आईचा हसरा चेहरा दिसतोय.ती हसरी स्पंदन दूर लंडनमध्ये असलेल्या बाबापर्यतही पोचलेली दिसतायेत. मी पहिल्याच प्रयत्नात यूपीएससी उत्तीर्ण झालेय.