पाककृती स्पर्धा १- मोदक बनवणे ( सुकुर मोदक) - वावे

सर्वप्रथम मनीमोहोर यांचे खास आभार. त्यांच्या उकडीच्या पाककृतीमुळे माझं काम एकदम सोप्पं झालं. कारण मोदकांसाठी आणलेली पिठी गणेश चतुर्थीचे मोदक करतानाच संपली होती. त्यांची उकडीची कृती अत्यंत सोपी आहे. मी प्रथमच केली आणि चांगली जमली.

आता सुकुर मोदक या नावाविषयी. या मोदकांच्या आतलं सारण हे सुकुरउंडे (सुकरुंडे) या कारवारी/कोकणी पदार्थात वापरलं जाणारं सारण आहे. ते गोल असतात म्हणून उंडे, हे मोदक आहेत म्हणून मी सुकुर मोदक असं नाव दिलंय मला सुकुर या शब्दाचा अर्थ माहिती नाही.

सुकुर मोदकांसाठी लागणारं साहित्य-

सारणासाठी
१ वाटी चण्याची डाळ,
१ वाटी ओला नारळ,
दीड वाटी चिरलेला गूळ
जायफळाची पूड स्वादापुरेशी,
सुकामेवा- बदाम, पिस्ते वगैरे आवडीनुसार.

पारीसाठी
अर्धी वाटी इंद्रायणी तांदूळ,
अर्धी वाटी बासमती तांदूळ,
दीड वाटी पाणी
एक छोटा चमचा तूप,
एक छोटा चमचा तेल,
चिमूटभर मीठ.

सारणाची कृती
चण्याची डाळ दुप्पट पाणी घालून कुकरला १५ मिनिटं शिजवून घेतली. त्यात गूळ आणि नारळ घालून पुरण शिजवून घेतलं. शेवटी जायफळाची पूड घातली. पुरण वाटायचं नाही. ढवळताना डाळ जेवढी मोडते तेवढी पुरे. सुकामेवा जाडसर तुकडे/ काप करून घेतले. पुरण गार करत ठेवलं.

आता उकड.
(ही उकड मी मनीमोहोर यांच्या कृतीने केली आहे. पिठी वापरून पारंपरिक पद्धतीने केली तरी अर्थातच चालेल)

उकडीसाठी दोन्ही प्रकारचे तांदूळ एकत्र करून, धुवून रात्री भिजत ठेवले. सकाळी ते पूर्ण निथळून घेतले आणि मिक्सरमध्ये थोडं थोडं पाणी घालून (यासाठी दीड वाटीतलंच पाणी वापरलं) अत्यंत बारीक, गंधासारखे वाटले. दीड वाटीपैकी उरलेलं पाणी या वाटलेल्या तांदुळात घातलं. मीठ, तेल आणि तूप घालून ते मिश्रण नॉनस्टिक पॅनमध्ये घालून सतत ढवळत राहून शिजवलं. थोडं घट्ट झाल्यावर झाकण ठेवून दोन वाफा काढल्या.

उकड हाताला सोसेल इतकी गार झाल्यावर थोडी मळून घेतली. छोटे गोळे करून आपण नेहमी मोदकाची पारी करतो तशी पारी करून, आत पुरण भरून मोदक केले.

ही उकड थंड झाली तरी मोदक व्यवस्थित करता येतात, पारीला चिरा वगैरे अजिबात जात नाहीत. फारशी मळावीही लागत नाही.

नेहमीसारखे मोदक करून वाफवून घेतले.

सोबत तूप्/दूध/ नारळाचं दूध घ्या नाहीतर नुसतेच खा ..आपापल्या आवडीनुसार