मेकअप - माझा.... तुमचा..... सगळ्यांचा.....

सगळ्यांचे खूप खूप आभार. सगळ्यांना वैयक्तिक उत्तर द्यायचे होते पण इथे मला मोठ्या कमेंट्स टाकता येत नाहीयेत. आणि एक मोठी कमेंट टाकायच्या प्रयत्नात दोन दिवस इथे काही लिहिता आले नाही. काय करायला हवे ते आता समजले, मोठी कमेंट छोट्या छोट्या भागात तोडून टाकेन.

*मेकअप* हा माझा पहिलाच सिनेमा. *मेकअप* ची को-रायटर म्हणून मला माझ्या ह्या क्षेत्रातील अनुभवाबद्दल थोडसं शेअर करावसं वाटलं...

2014 मध्ये आयटी फील्ड सोडल्यावर स्वकमाईचा नवा मार्ग मी शोधतच होते. तो ही असा जिथे कमीतकमी वेळ प्रवास करावा लागेल. मधल्या काळात मी छोट्या छोट्या कथा लिहायला पुन्हा सुरुवात केली होती. 2015 च्या एप्रिल महिन्यात लेखनातून काही अर्थप्राप्ती होते का हे बघावे असा विचार करून मी कौतुक शिरोडकरकडे सल्ला मागितला त्याची आणि माझी सुद्धा काही घनिष्ठ दोस्ती किंवा खूप चांगली मैत्री वगैरे नव्हती. पण त्याने अगदी मोकळेपणाने मला त्याच काळात स्थापन होऊ घातलेल्या लेखकांच्या नवीन संघटनेबद्दल सांगितले

आणि मानाचि (मालिका नाटक चित्रपट) ह्या लेखकांच्या संघटनेच्या पहिल्याच मोठ्या मिटींगला मी हजर होते. तिथे ममता सरदेसाई आणि निनाद शेट्ये या दोघांबरोबर ओळख झाली. खरे तर पहिल्याच भेटीत खूप चांगली मैत्री झाली म्हणा ना. त्या दोघांनीही मला मानाचि नक्की जॉईन कर तुला कधीतरी नक्कीच फायदा होईल हे समजावून सांगितले, खरे तर इंसीस्ट केले. मी तिथे कोणालाच ओळखत नव्हते. पण ममता आणि निनाद मुळे मी मानाचि जॉईन केली.

त्या वर्षात मानाचिचे बरेच कार्यक्रम झाले ज्यांत मी स्वयंसेवक म्हणूनही काम केले. त्यामुळे मानाचित ऍक्टिव्ह असणाऱ्या दिग्गज लेखकांबरोबर माझी ओळख झाली. 2015 च्या नोव्हेंबरमध्ये मानाचिच्या ग्रुपवर वैभव चिंचाळकरने (कट्यार... सिनेमाचा असि डा.) चित्रकथी मालिकेबद्दल कळवले. त्या मालिकेत 2 एपिसोड लिहून माझ्या मालिका लेखनाची सुरुवात झाली. माझं नाव पहिल्यांदा स्क्रीनवर झळकल आणि माझ्या लेखनाचा पहिला चेक मला मिळाला.

जानेवारीमध्ये मराठी नाट्य निर्माता संघाने आयोजित केलेल्या दिर्घांक स्पर्धेमध्ये मध्ये मानाचिच्या टीमने भाग घ्यावा अशी टूम निघाली आणि तेव्हा माझी सुप्रसिद्ध लेखक आणि अनेक नाटकांचे दिग्दर्शक गणेश पंडित यांच्याशी ओळख झाली. त्यानंतर गणेशदादा पटकथा लिहीत असलेल्या मालिकेचे संवाद लिहायची संधी मला मिळाली. पहिल्या (full fledged) मालिकेपासूनच माझ्या लेखनाच श्रेय मलाच मिळालं.

आज त्याच्याबरोबर पहिला चित्रपटाचं सहलेखन केलं तेव्हा सुद्धा त्याने मी डिझर्व करत असलेलं क्रेडीट मला दिलं, सहलेखिका म्हणून स्वतःच्या नावाची वेगळी स्लेट. काही भावना शब्दात नाही मांडता येत, त्याला इमोटीकॉन्सच लागतात.

गेले काही दिवस मेकअपच्या जाहिराती तुम्ही पेपर मध्ये बघितल्या असतील, सगळ्या जाहिरातींमध्ये सिनेमाच्या सगळ्या डिपार्टमेंटहेड्स ची नावे त्याच फॉन्टमध्ये आणि त्याच फॉन्टसाईज मध्ये आहेत ज्या फॉन्ट मध्ये आणि फॉन्ट साईज मध्ये त्याचे स्वतःचे नाव. स्वतः दिग्दर्शक म्हणून स्वतःला खास ठळक प्रेझेंटेशन त्याने दिलेले नाही. जे इतर प्रत्येक सिनेमाच्या पोस्टर वर दिसते. आणि ही गोष्ट मला खुप महत्त्वाची वाटली आणि कॅप्टन ऑफ द शिप म्हणून केलेल्या मला त्याच्या ह्या कृतीचे खूप जास्त कौतुक आहे

15 वर्षे कॉर्पोरेट मध्ये काम करुन तऱ्हेतर्हेच्या चांगल्या वाईट लोकांना भेटले होते, पण ह्या फिल्डमध्ये फार कमी लोक प्रामाणिक आणि मोठ्या मनाचे असतात जे वेळेवर पैसे आणी योग्य क्रेडिट देतात, तेव्हा मला खूप टेन्शन आले होते की मी इथे टिकू शकेन का. आता अशा एका अत्यंत प्रामाणिक आणि मोठ्या मनाच्या माणसाबरोबर मी काम करताना मी क्षणाक्षणाला देवाचे आणि मला आशीर्वाद देणार्यांचे आभार मानते. हे सगळे मला मानाचिमुळे लाभले आणि मानाचि माझ्या आयुष्यात आली कौतुक निनाद आणि ममता मुळे. म्हणून कौतुक, निनाद ममता आणि मानाचि च्या टीमचे शतशः आभार

अनिवासी भारतीयांसाठी काही कळणार ही फिल्म डिजिटल प्लॅटफॉर्मवरही येईल.

पुन्हा एकदा सगळ्यांना धन्यवाद

सगळ्यांचे खुप खूप आभार, तुम्ही सिनेमा बघितला असेल तर मला तुमचा फीडबॅक नक्की कळवा