अशी पाखरे येती...२ (काळा शराटी)

अशी पाखरे येती - १

मागील वर्षी भिगवणला असणाऱ्या मित्राचा फोन आला होता की त्याच्या शेताजवळ गेले दोन तिन दिवस काळा शराटी दिसतो आहे. खरं तर त्याचा पहिल्या दिवशीच फोन आला होता पण त्याला सांगितले की अजुन दोन दिवस दिसला शराटी तर पुन्हा फोन कर. मी येवून जाईन तिकडे. त्याप्रमाणे त्याने दोन दिवसानंतर फोन करुन सांगितले की शराटी अजुन येतो आहे. मी गाडी काढून भिगवणला गेलो पण शराटी काही आला नाही. दुसऱ्या दिवशीही दिसला नाही. मग मित्राकडे भिगवणचे मासे खावून परत पुण्याला आलो. एक मात्र अजुनही समजलं नाही की खरच शराटी आला होता आणि मी आल्यावर गेला की मला भिगवणला बोलावण्यासाठी मित्राने माझी आवड लक्षात घेवून शक्कल लढवली होती ते. तो कितीही शपथेवर सांगत असला तरी अशा बाबतीत माझे मित्र विश्वास ठेवायच्या योग्यतेचे नाहीत हे मला माहित आहे. अर्थात त्यावेळी पक्षी पहायला आवडायचे इतकेच. त्यामुळे फारसे वाईट वाटले नव्हते. पण गेल्या काही दिवसांपासुन बर्ड फोटोग्राफीचा ताप चढल्यामुळे या शराटीची खुपच आठवण यायला लागली होती. विकीवर त्याची माहिती काढून झाली, पाठ करुन झाली, फोटो पाहून झाले. निघोजला हमखास शराटी दिसतो म्हणून तिकडेही भर पावसात चक्कर मारुन आलो पण हा आयबिस काही दर्शन द्यायला तयार नव्हता. एक दिवस सकाळी पोहे खात बाल्कनीत बसलो होतो. समोर करकोचे असल्यासारखे वाटले. बायकोला म्हणालो देखील की या करकोच्यांऐवजी शराटी आले असते तर काय बहार आली असती. तोवर बायकोने शराटी पाहिला नव्हता. ती म्हणाली निट पहा. करकोचे दिसत नाहीत ते. मी झटपट पोहे बाजूला ठेवले आणि कॅमेरा आणला. ते दोघेही माती खोदत, उकरत आमच्याच दिशेने येत होते. काही वेळाने जरा जवळ आल्यावर त्यांच्या डोक्यावरचे लाल त्रिकोन आणि पंखावरची निळसर झाक एकदम झळाळली आणि मला चक्क दोन शराटींचे दर्शन झाले. त्यानंतर ते तासभरतरी तेथे खाद्य शोधत फिरत होते. भरपुर फोटो काढले. त्यानंतर ते दोन दिवस येत राहीले. मीही सकाळी सकाळी त्यांची वाट पहात होतोच. फोटोही काढले खुप. पण दर्दैवाने तिनही दिवस आकाश ढगाळ असल्याने फोटो ठिक आले नाहीत. मधे गणपती आले आणि शराटी यायचे बंद झाले. ते नेमकी गणेश विसर्जनाच्या दिवशी अचानक अवतरले. पण त्या दिवशीही ढगाळ वातावरण असल्याने फोटो ठिक आले नाहीत. या दिवशी मात्र दोन्ही शराटींनी अन्न न शोधता देवराईच्या पलिकडील बाजूच्या कंपाऊंड वॉलवर तासभर स्वतःची मग एकमेकांची पिसे साफ केली. चोचीत चोच घालून काही गुजगोष्टी केल्या आणि गेले. मला फोटो जरी हवे तसे मिळाले नाही तरी त्यांचे फार व्यवस्थित निरिक्षण करता आले. ते भरपुर वेळ बसलेही असते कदाचीत पण दोन कुत्री त्यांच्या मागे लागली आणि ते उडून गेले. त्यांना निरखत बसणे या सारखा दुसरा आनंद नाही. फोटो जसे आलेत तसे तुमच्यापुढे ठेवत आहे. तुम्हालाही आवडतील.

(मराठी नाव: काळा शराटी किंवा काळा अवाक. इंग्रजी नाव: Red Naped Ibis (रेड नॅप्ड आयबिस) शास्त्रीय नाव: Pseudibis papillosa (स्यूडिबिस पॅपिलोसा) आकार: साधारण २७ इंच, म्हणजे तसा बराच मोठा पक्षी आहे हा. रंग: फोटोत दिसत आहेच. नर व मादी एकसारखेच दिसतात. बाकी माहिती गुगलवर आहेच)

प्रचि: १

प्रचि: २

प्रचि: ३

प्रचि: ४

प्रचि: ५

प्रचि: ६

प्रचि: ७

प्रचि: ८

प्रचि: ९

प्रचि: १०

प्रचि: ११

प्रचि: १२

प्रचि: १३

प्रचि: १४

प्रचि: १५

प्रचि: १६

प्रचि: १७

प्रचि: १८

बोनस स्नॅपशॉट. अनंत चतुर्दशीला दिसलेली पिंगळ्यांची पिल्ले. (Spotted Owlet)
प्रचि: १९

प्रचि: २०

फोटोंना कॅप्शन काही सुचल्या नाहीत. तुम्हाला काही सुचल्या तर नक्की सांगा.