सोळा आण्याच्या गोष्टी- वारस - कोहंसोहं१०

पाटीलसाहेबांचा रक्ताच्या थारोळ्यात पडलेला निष्प्राण देह, बाजूला अर्धवट नशेत बसलेला साहेबांचा मुलगा अन वर्गमित्र रमेश, त्याच्या हातातली पिस्तूल, कोपऱ्यात विमनस्क बसलेली त्याची गर्भवती पत्नी लीना हे दृश्य पाहून इन्स्पेक्टर विजयच्या डोळ्यातही अश्रू तरळले. पिस्तूल, दारूची बाटली, घराची कागदपत्रे, रमेशच्या हाताचे ठसे त्याने गोळा करून तपासासाठी पाठवले. घर नावावर करावे यासाठी रोज रात्री दारू पिऊन रमेशची पाटीलसाहेबांशी भांडणे होत हे माहित असूनही रमेश खून करेल हे विजयला स्वप्नातसुद्धा वाटले नव्हते. अधिक चौकशीसाठी विजयने रमेशच्या खोलीची झडती घेतली आणि मिळालेला मेडिकल रिपोर्ट पाहून डोळे विस्फारले.....
"होय मीच केला खून....नपुंसक रमेशमुळे घराण्याला वारस मिळावा म्हणून पाटीलसाहेबांनी केलेल्या बलात्काराचा बदला म्हणून..." चौकशीअंती लीना उत्तरली.