दुधी भोपळा - स्पेशल

साज,
सगळ्या रेसिपीज छान आहेत. नक्की करुन बघेन.

छान आहेत रेसिपीज. वांग्याच्या कापासारखी रिन्ग्ज ची आयडिया आवडली.

इथे अजून काही दुधीच्या भाज्या, सांबार, चटण्या इत्यादी पदार्थ आहेत -
http://www.maayboli.com/hitguj/messages/103383/82292.html?1192586783

साज
मला दुधी भोपळ्याची भाजी प्रचंड आवडते, योगायोगाने आज डब्यात ही आणली आहे.
तुम्ही दिलेल्या सर्व रेसिपीज एकदम इंटरेस्टींग आहेत. करून पाहीन.

साज, मस्त पाकृ.... दुधीचे पराठे जास्त आवडले. मी करते तेव्हा त्यात तो कोरडा मसाला घालत नाही. आता घालून बघेन.
दुधीमध्ये भरपूर कॅल्शियम असतं. बाळंतिणींना मुद्दाम दुधीचे पदार्थ खायला घालतात. मला फक्त दुधीहलवा आवडत असे. पण बाळंतीण झाल्यावर रोज रोज तो खाणं परवडणारं नव्हतं. त्यामुळे माझी आई रोज रात्री जेवणात दुधीचं भरीत करायची. ते मात्र मला खूप आवडू लागलं.

त्याची कृती एकदम सोप्पी आहे:

दुधीच्या फोडी वाफवून घ्यायच्या. थंड झाल्यावर त्यात मीठ, दही आणि चिरलेली कोथिंबीर घालायची आणि वरून मस्त तूप, जीरे, हिंगाची फोडणी घालून ते सगळं एकत्र कालवायचं आणि खायचं.

माझ्या डोक्यात,
दूधी = हलवा,
हेच बरीच वर्षे लहानपणापासून(कारण घरी सुद्धा कधीच भाजी केली नाही ह्याची आईने बहुधा) तेव्हा एकदा शाळेत मैत्रीणीने भाजी बनवून आणली तर अरे ह्याची भाजी करून खात नाहीत, चांगले नसते असा मी गोंधळ घातला खरेच व तिला गोंधळवले एकदम. ती पंजाबी मैत्रीण हमारे मे तो खाते है. मग मी त्यानंतर आजारी झाले तेव्हा आईन रोज सूप पाजून बेजार केले मला. आजही भाजी कोणीही खात नाही. तेव्हा हे करून पाहिन.

साज,
छान आहेत रेसिपीज, मंजुडि मी पण हे भरीत करते. परोठे पण करते, पण त्यात कधि वेलची, बडिशोप नाही घालुन बघितलं. मी थोडं आंबट दही घालते. हे करुन पाहीन. आणि दुधिच्या साध्या भाजीत मॅगीचा मसाला किंवा क्युबज घालुन पण छान लागतं. जरा चायनीज चव येते. दुधिची पिठ पेरुन भाजी पहिल्यांदाच बघितली. ती सुद्धा करुन पाहिलि पाहिजे.

छान आहेत सगळ्या कृति. दूधी भोपळा हि मानवाला परिचित झालेली पहिली भाजी मानली जाते.

वरच्या सगळ्या रेसिपी चांगल्या आहेत. त्या, भरित याशिवाय मी मुठिया पण करते दुधीच्या. मस्त होतात. दुधी न आवडणारे पण खातात.. कळतच नाही ना..

आमच्याकडे आठवअड्यातून एकवेळेला तरी दुधी होतोच. नेहेमीची डाळ घालून भाजी किंवा कोफ्ते किंवा कधीकधी तुपावर फक्त लसण्-हिरवी मिरची घालून फोडी किंवा किस परतणे इतकेच प्रकार होतात. आता यातले पदार्थ करून बघेन. :)तसही त्याच त्याच प्रकारे भाजी खायचा कंटाळा आला होता.

असो, दुधिचा अजून एक उपयोग मला माहित आहे. दुधी किसून त्याचा फुलपात्रंभर रस काढून त्यात अर्धा लिंबू आणि चवीपुरतं मीठ घालून जर हा रस सकाळी अनोशापोटी प्यायला तर म्हणे वजन कमी होतं खूप...

हो हार्ट पेशंटनीही आवर्जुन प्यावा. ( मीठ न घालता. )

अग खास रेसेपी नाहीय्ये त्याची. दुधी किसावा त्यात गव्हाचे जाडे पीठ् १ वाटी(गुज्जू लोक भाकरी(आपले गाकर) करताना वापरतात ते), १वाटी कणीक,तिखट,मीठ,ओवा,कोथिंबीर, आवडत असेल तर थोडं आललसूण पेस्ट अस थुलथुलीत मिश्रण तेलाचा हात लावून कुकरच्या डब्यात घालून वाफवावे. आपण मेथी मुटकुळे वाफवतो तसे. नंतर कापून वड्या करून फोडणी द्यावी हिंग-जिरे-तीळ यांची. उकडलेले असल्याने थोडी फोडणी पुरते. आवडत असल्यास १० मि. परतावे चांगले ब्राऊन दिसतेत मग.

अजुन एक रेसिपी:

दुधीचे सुप
दुधीच्या फोडी करुन कुकर मध्ये उकडून घ्या. त्याची मिक्सर मध्ये बारीक प्युरी करुन घ्या. गाळायची गरज नाही पडत. आवश्यकतेनुसार पाणी घालून उकळायला ठेवा. यामध्ये मीठ मिरपूड घालून प्यायला देण्याआधी लिंबू पिळा.

चीज किसून सुध्दा देता येइल, फक्त त्या वेळेस लिंबू पिळू नये.

दुधीचे भरीत जे इथे दिले आहे त्याला आम्ही रायते म्हणतो. दुधीच्या छोट्या चौकोनी फोडी वाफवुन, हळद/हिंग/हिरवी मिरचीची फोडणी आणि दही, कोथींबीर वाटल्यास नारळ/दाण्याचा कूट.

दुधीचे मुटके (मुटकुळे पण म्हणतात) एग करीला करतो तशी करी करुन त्यात खूप छान लागतात. मुटके करताना चमचा दोन चमचे थालीपीठाची भाजणी घातली तर मस्त खमंग चव येते. लहानपणी सहलीला जाताना आई असे मेथीचे, दुधीचे आणि कोथींबीरीचे मुटके डब्यात द्यायची. थोड्या तेलावर खरपूस परतून

माझी आई आमच्या लहानपणी दुधीची गोड भाजी ( खरं तर हलव्याचाच प्रकार ) करायची . दुधी किसून तुपावर लवंग, दालचिनीवर फोडणीस घालायचा. चांगला परतला की त्यात ओले खोबरे टाकून एक वाफ काढायची, अन मग त्यात चवीनुसार साखर टाकून परतायचे. नेहमीच्या हलव्यापेक्षा चव थोडी वेगळी असल्याने आम्ही आवडीने खायचो

दुधी भोपळा व चवळीची भाजी मस्त होते.
दुधीच्या सालं काढून मध्यम आकाराच्या फोडी करायच्या. चवळी भिजवून कुकरला वेगळी शिजवून घ्यायची. ती बाजूला ठेवायची. तेलाची फोडणी करायाची. अर्थातच मोहोरी हिंग घालून. पण यात मोहोरी तडतडली की अर्धा चमचा मेथी दाणे ही घालायचे. मग हिंग घालायचा. मग सुकी लाल मिरची कढीलिंब घालून परतून त्यावर दुधीच्या फोडी , मीठ, काळा मसाला ( १ च.) घालून अर्धी वाटी पाणी घालून झाकण ठेवावे. व शिजली की मग आधी शिजवलेली चवळी घालून थोडा गूळ घालून एक वाफ काढायची. व गॅस बंद करावा. ही भाजी मेथ्या घातल्यामुळे खमं ग होते. वरून भरपूर कोथिंबीर खोबरं घातल्यास अधीक चविष्ट होते. ही भाजी रसदार करावी. पोळी/भात दोन्हीबरोबर मस्त लागते. तुमच्या काळ्या मसाल्यात तिखट नसेल तर थोडे तिखट(लाल मिरची पावडर) ही फोडणीत घालावे.

माझी आई साधारण अशाच पद्धतीने भिजवलेली मूग डाळ घालुन करते. पाणी घालत नाही. झाकण घालुन वाफ येइल तेव्हढेच पाणी. मी एकदा मोड आलेल्या मेथ्या घालुन केली होती, चांगली लागली. मोड आलेल्या मेथ्या फार कडु लागत नाहीत त्यामुळे माझ्या लेकाने पण खाल्ली होती

आमच्याकडे आठवअड्यातून एकवेळेला तरी दुधी होतोच. नेहेमीची डाळ घालून भाजी किंवा कोफ्ते >>अल्पना ही कोफ्ताची रेसिपी लिही ना जरा.मला फार आवडते ही पंजाबी स्टाईल भाजी.

सकाळी नाश्त्या मधे दुधी भोपळा कसा वापरता येईल??

>>सकाळी नाश्त्या मधे दुधी भोपळा कसा वापरता येईल??
पराठे करता येतील किंवा वर लिहिलेले वाफवलेले मुठिये पण चांगले लागतील.दक्षिणा ने लिहिलेला दुधीचा रस पण ट्राय करून पहाता येइल.

साज... सगळ्या रेसिपी मस्त.
मी मुठीया ट्राय केल्या आन-मिरा. मस्त झाल्या होत्या. थँक्स रेसिपीबद्द्ल.

दुधीच रायत करताना माझी आई थोडी मोहोरी कुटून घालते .ते खूप छान लागते

काल इथे लिहीलेल्या पद्धतीने पराठे केले होते.. टेस्टी झाले होते. धन्यवाद.