माझे अनुवादित पुस्तक - ब्रेन रूल्स

Brain Rules

Brain Rules हे जॉन मेडिना या मूळ इंग्रजी पुस्तकाचे माझे भाषांतर नुकतेच प्रकाशित झाले आहे.
प्रकाशक आहेत साकेत प्रकाशन. हे न्यू यॉर्क बेस्ट सेलर आहे.
हे पुस्तक तुमच्या आमच्या सारख्या सामान्य वाचकांसाठी आहे, ( तुम्ही चेतापेशी शास्त्रज्ञ वा मानसोपचार तज्ञ नाहीत असे मी गृहित धरतो. सर्वसामान्यत: आपण वैद्यकीय वा मानसशास्त्रावरील पुस्तक विकत घेणार नाही आणि म्हणूनच तुम्हाला जॉन मेडिनाचे हे आपल्या सारख्या वाचकांसाठी लिहिलेले पुस्तक वाचायला नक्कीच आवडेल.
आपल्यातील बहुतेकांना आपल्या मेंदूत काय उलथापालथ होत असते हे मुळीच ठाऊक नसते. त्या मुळे प्रत्येक व्यावसायिक, शिक्षक, पालक, विद्यार्थी यांना त्या बद्दल काय ठाऊक असलेच पाहिजे या वर संशोधन करून त्या बद्दल या पुस्तकात रोचक भाषेत विवरण केले आहे.
या पुस्तकात मेंदूच्या १२ नियमांचे विवरण केले आहे.
आपण कसे शिकतो? निद्रा आणि तणावाचा आपल्या मेंदूवर तसेच जीवनशैलीवर काय परिणाम होतो? आपण एखादी गोष्ट एवढ्या सहजासहजी कशी विसरू शकतो? पुरुष आणि स्त्रियांच्या मेंदूची जुळणी भिन्न असते असे म्हणतात ते खरे आहे का?

• हे पुस्तक मेंदूची रचना आणि आपली जीवनशैली, याची शास्त्रोक्त आणि संशोधनावर आधारित वैज्ञानिक तथ्यांच्या आधारे वाचकाशी संवाद साधून भेट घडवते.
• लेखक मेंदूविज्ञान तसेच मानसशास्त्र व रेणुविज्ञान यातील प्रतिथयश शास्त्रज्ञ, प्राध्यापक, संशोधक आहेत.
• शरीर विज्ञान शास्त्रातील, मेंदूशी निगडित महत्त्वाच्या व अत्यंत विद्वत्ताप्रचुर संशोधनाची अत्यंत मनोरंजक, विनोदी शैलीत मांडणी या पुस्तकात केलेली आहे.
• मेंदू आणि व्यायाम यांचा अन्योन्य संबंध,मेंदूची आणि मानवाची परस्परावलंबी समांतर उत्क्रांती,एकाग्र होणे म्हणजे काय,स्मरणशक्ती व स्मृती या दैनंदिन स्वभाव-वैशिष्ट्याची उकल, निद्रा आणि शारिरिक व मानसिक स्वास्थ्य यांचा थेट परस्पर संबंध, दृष्टि म्हणजे काय या व यासारख्या असंख्य अन अद्यापि बहुतेकांसाठी अतर्क्य असणार्‍या बाबी या पुस्तकातील अत्यंत आकर्षक लेखनातून उलगडतात.
• जीवनात कुतुहल म्हणजेच चिरतारुण्याचा मार्ग कसा या बद्दल विवरण करण्यात आले आहे.
• आपल्या संपूर्ण हयातीत मेंदूचे साम्राज्य कशा प्रकारे आपले नियम प्रस्थापित करते याचे विवेचन.
• वृध्दापकाळातील अल्झायमर सारख्या व्याधी का होतात याचे सोप्या शब्दात विवेचन.

संभाव्य वाचक व श्रोतृवर्ग
• विद्यार्थी, व्यावसायिक
• जिज्ञासू ज्ञानपिपासू वाचक
• मानसशास्त्रज्ञ
-चिकित्सक
• सामान्य सुशिक्षित वाचक
• स्वास्थ्य क्षेत्रातील व्यावसायिक

या पुस्तकाचा अनुवाद करतांना - मी मानस शास्त्राचा व न्युरोसायन्सचा विद्यार्थी नसल्याने अनेक आव्हाने निर्माण झाली. प्रत्येक फंक्शन समजावून घेण्यासाठी तज्ञ डॉक्टरांना भेटावे लागले आणि त्या मुळे खूप शिकता आले.
जिज्ञासू मायबोलीकरांनी संग्रही ठेवण्याजोगे पुस्तक.