अष्टविनायक दर्शन : श्री मोरेश्वर

श्री मोरेश्वर- मोरगाव, जि. पुणे

मार्ग- पुणे-सातारा मार्गावर पुण्यापासुन ६४ कि. मी. अंतरावर. अनेक मार्गांनी इथे महाराष्ट्र राज्य परिवहन मंडळाच्या गाड्या येतात.

यात्रा- भाद्रपद शु. चतुर्थी व माघ शु. चतुर्थी. या दोन्ही तिथींना चिंचवडहून श्रींची पालखी मोरगावी येते.

मूर्ती- स्वयंभू. मखरात बसवलेली, वर नागफणा. मूर्ती उकिडव्या अवस्थेत बसलेली आहे. सोंड डावीकडे. सबंध मूर्ती सिंदूरचर्चित. मूर्तीच्या पुढ्यात पाषाणाचे उंदीर व मोर.

मंदिर- उत्तराभिमुख. इस्लामी धर्तीची बांधणी. प्रचंड दीपमाळा. भक्कम तटबंदी. मंदिराजवळ थोड्या अंतरावरून कर्‍हा नदी वाहते. मंदिरापुढे चौथर्‍यावर प्रचंड नंदी. जवळच दगडी उंदीर.

इतिहास- हे क्षेत्र गाणपत्य संप्रदायाचे आद्यपीठ आहे. अष्टविनायकांच्या गणनेत या देवाला अग्रस्थान आहे. मोरया गोसाव्यांनी इथे तप केले. इथे कर्‍हा नदीत त्यांना गणेशमूर्ती मिळाली, ती घेऊन ते चिंचवडला गेले.