कविता - ७ - पावसातला एक दिवस

ही खिडकी
या चित्राची चौकट,
चित्र खिडकीतल्या माझे.
चित्रात बसून पाहात आहे
नाट्य निसर्ग राजाचे.

गिरक्या घेत वारा येतो
वार्ता देतो वर्षेची,
उधळत येते वर्षाराणी
मूठ टपोर्‍या मोत्यांची.
हिरवा शालू नवसृष्टीचा
भूमातेला देते ती
मृदू कोवळ्या ऊनज्योती
भूमातेला ओवाळीती.
सरीसरींच्या सतारी
कधी मल्हारधून छेडती,
हिरवी बाले भूमातेची
इंद्रधनूवर झोके घेती.
निसर्गराजा गाली हसतो,
धरित्रीला तो कवेत घेतो
मग चित्रातूनी या अलगद उतरून
नाट्यामध्ये मी रमून जाते.

२९-८-१९९६