सुकं भरलं वांगं (सांबार मसाल्यासहित)

Submitted by ललिता-प्रीति on 14 March, 2013 - 00:46
प्रत्यक्षात लागणारा वेळ: 
३० मिनिटे
लागणारे जिन्नस: 

छोटी वांगी - ६
छोटे कांदे - २
छोटे बटाटे - २
डाळीचं पीठ (बेसन) - एक ते सव्वा वाटी (किंचित जाडसर बेसन असल्यास उत्तम.)
सांबार मसाला - ३-४ चमचे
धने पूड - अर्धा चमचा
जीरेपूड - अर्धा चमचा
चिंचेचा पातळ कोळ - पाऊण वाटी
मीठ - चवीनुसार
तिखट - चवीनुसार
तेल

क्रमवार पाककृती: 

- वांगी धुवून आणि कांदे, बटाटे सालं काढून उभी चीर पाडून घ्यावेत. (देठाचा थोडा भाग ठेवला, तर वांगी पालटायला सोपी जातात.)
- चिंचेचा कोळ आणि तेल वगळता अन्य कोरडं साहित्य एका भांड्यात चांगलं मिसळून घ्यावं.
- आता या मिश्रणात अंदाज घेत थोडा थोडा चिंचेचा कोळ घालावा. मिश्रणाचा ओला लगदा होता कामा नये. केवळ त्याचा भुरभुरीतपणा जावा आणि ते वांग्यात व्यवस्थित भरता यावं इतकाच कोळ घालायचा.
- हा मसाला कांदा-वांगं-बटाट्यात भरावा.
- कढईत तेलाची चळचळीत फोडणी करून त्यावर भरली वांगी-कांदे-बटाटे ठेवावेत.
- झाकण टाकून एक वाफ द्यावी.
- झाकण काढून मसाला उरला असेल तर तो भाजीवर पसरावा. वांगी-कांदे-बटाटे थोडे हलवावेत. (हे अलगद करावं लागतं. नाहीतर अर्धा कोरडा मसाला बाहेर येतो.) २-३ चमचे चिंचेचा कोळ सगळीकडे पसरून घालावा. पुन्हा झाकण ठेवून वाफ द्यावी. भाजी खरपूस शिजेपर्यंत हे करावं. (३-४ वेळा कोळ घालावा लागतो.)
- पोळी/भाकरीबरोबर भाजी वाढावी. (मी तर नुसतीही खाते. :फिदी:)

Copy of DSC03739.JPG

वाढणी/प्रमाण: 
२ जणांसाठी
अधिक टिपा: 

१. प्रत्येक कांदा-वांगं-बटाट्यासाठी एक-एक चमचा बेसन आणि पाव-पाव चमचा सांबार मसाला असं प्रमाणही वापरू शकता.
२. ही भाजी अगदी मंद गॅसवर कढईतच करावी लागते; प्रेशर-कुकर/प्रेशर पॅनमधे नाही.
३. जरा पेशन्सचं काम आहे, पण चव अप्रतिम लागते.
४. नुसत्या वांग्यांचीही भाजी चांगली लागते. एकदा मी केलेला मसाला जास्त झाला. म्हणून मी त्यात कांदे-बटाटे पण घातले. ते चांगले लागले. तेव्हापासून या तीनही भाज्या वापरून करते.
५. मी चमचा-वाटी मोजून काटेकोर प्रमाण कधी घेत नाही. मात्र कोळ घालण्यापूर्वी कोरड्या मिश्रणाची चव घेऊन पाहते.
६. ३० मिनिटे हा वेळ भाज्या चिरण्यापासून ते भाजी शिजण्यापर्यंतचा धरलेला आहे.

माहितीचा स्रोत: 
मंजीचं सासर.
आहार: 
शाकाहारी
पाककृती प्रकार: 
भाज्या
शब्दखुणा: 
सुकी भाजी
भरलं वांगं
सांबार मसाला
चिंचेचा कोळ
Groups audience: 
पाककृती आणि आहारशास्त्र
Group content visibility: 
Public - accessible to all site users
शेअर करा

अरे खूपच छान आगळा वेगळा प्रकार. नेहेमी तेच तेच दाण्याचे कुट आणी तीळ कुट वापरुन कंटाळा आलाय. धन्यवाद ललिता.

Submitted by रश्मी. on 14 March, 2013 - 00:59

मस्त रेसिपी

>>>>छोटे कांदे - २
डाळीचं पीठ (बेसन) - एक ते सव्वा वाटी (किंचित जाडसर बेसन असल्यास उत्तम.)
धने पूड - अर्धा चमचा
जीरेपूड - अर्धा चमचा
तिखट - चवीनुसार
तेल>>>>>>>
वर दिलेले सगळे मसाले कांदा वैगरे भाजुन वाटायचे की कापुन डायरेक्ट वांग्यात भरायचे? Uhoh

Submitted by अविगा on 14 March, 2013 - 01:17

मस्तय रेस्पी लले.. Happy माझ्याकडे छोटे बटाटे आहेत त्यांचं काय करायच प्रश्नच होता आता ते बटाटे खपवाय्ला वांगी नि छोटे कांदे ( म्हण्जे नाल्यासाठी घोडा Proud ) आणते नि ही रेस्पी करुन बघते..
लले.. कांदे दिसत नाहीयेत विरघळलेत की काय ग ?? Uhoh Proud

Submitted by मेधा२००२ on 14 March, 2013 - 01:40

मस्त रेसिपी

>>>>छोटे कांदे - २
डाळीचं पीठ (बेसन) - एक ते सव्वा वाटी (किंचित जाडसर बेसन असल्यास उत्तम.)
धने पूड - अर्धा चमचा
जीरेपूड - अर्धा चमचा
तिखट - चवीनुसार
तेल>>>>>>>
वर दिलेले सगळे मसाले कांदा वैगरे भाजुन वाटायचे की कापुन डायरेक्ट वांग्यात भरायचे? अ ओ, आता काय करायचं

Submitted by अविगा on 14 March, 2013 - 02:22

..आखिर मैंने भी एक पाकृ चिपकाही दी...ललिता...... Lol Rofl
मस्त तोंपासु दिस्तीये भाजी Happy आणी छान सोप्पीही ..वॉव

Submitted by वर्षू. on 14 March, 2013 - 02:32

लले तू आणि पाकृ Uhoh
स्क्रोल केले तर एव्हड्या स्मायली.. मला वाटले विनोदी लेखन चुकुन इकडे टाकलेस की काय Wink

बाकी दिसतय भारी.. नक्की करण्यात येइल Happy

Submitted by वर्षा_म on 14 March, 2013 - 03:08

ललिताजीssssss आप भी, क्या बात है Happy

मस्त दिस्त्येय बाकी रेसिपी Happy

स्क्रोल केले तर एव्हड्या स्मायली.. मला वाटले विनोदी लेखन चुकुन इकडे टाकलेस की काय <<< वर्षे Lol

Submitted by लाजो on 14 March, 2013 - 04:29

लले, माहितीचा स्रोत वाचून गहिवरून आलं.
माझ्या साबा(त्यामुळे मी पण) कोरडाच मसाला (बेसन, तिखट, मीठ, सांबार मसाला, थोडं शेंगदाणा कूट) वांगं, कांदा-बटाट्यात भरतात, भाज्यांच्या ओलेपणामुळे तो मसाला चिकटून राहतो आणि फ्राय पॅन मधे तेलावर हे सगळे भरलेले तुकडे ठेवल्यावर त्याच्यावर एकेका वाफेला चिंचेचा कोळ सोडतात.
बरेच दिवसात केली नाही ही भाजी, चला उद्याच करते आता Happy

Submitted by मंजिरी सोमण on 14 March, 2013 - 04:34

सध्या मलापण वांगी खाण्यावर बंदी आहे. पण भाजी बघून राहावत नाही.. तेव्हा माझी खाद्यबंदी उठल्यावर मी ही भाजी करुन खाणारच.. Happy

- पिंगू

Submitted by पिंगू on 14 March, 2013 - 05:32

भाजी एकदम खल्लास दिसतेय.

आम्ही अशी भरली घोसाळी (इथे झुकिनी) करतो. वर दिलेला मसाला वजा कोळ + भाजलेले आख्खे तीळ + आमचूर पावडर किंवा लिंबाचा रस. चिंचेचा कोळ घालून करेन आता.

Submitted by तृप्ती आवटी on 14 March, 2013 - 09:46

वांग्यांचे कट्टर फॅन घरी आहेत, त्यांच्याकडे ही पाकृ अतीव प्रेमाने सुपूर्द करण्यात येईल! Happy

Submitted by अरुंधती कुलकर्णी on 14 March, 2013 - 09:48

वा! ललिता मस्त पाकृ!
माझ्या एका मैत्रिणीने परवा कोरडा मसाला भरून चाळणीवर वांगी वाफवली. केवळ अप्रतीम! बिन तेलाची वांग्याची भाजी कशी काय ? असा प्रश्न पडला होता पण फार चविष्ट झाली होती.
अर्थातच वांगी सांगलीची होती बरं! कृष्णाकाठची! तिचंही म्हणणं पडलं की अशी बिन तेलाची वांगी करायला तुमची ती नगरी वांगी नाही चालणार. यासाठी फक्त कृष्णाकाठचीच वांगी!
असो.........आमच्या घरात हा वादाचा मुद्दा आहे! वांगी ती वांगी.............त्यात काय एवढा फरक असणार आहे? इ.इ.

Submitted by मानुषी on 14 March, 2013 - 10:01

Pages