मांजर, मी आणि 'तो'

पंधरा दिवसांपूर्वी घरात एक छोटे मांजर आले. साधारण दोन एक महिन्याचे असावे. आमच्या पूर्वीच्या मांजराने नवा घरोबा केला असल्याने या नव्या जिवाला आनंदाने ठेऊन घेतले.

मांजर अगदी घरचेच झाले आहे. व्य्वस्थीत खाते, खेळते आणि माझ्याबरोबरच झोपते. स्वतःची स्वच्छ्तही छान राखते. घरच्या एका कोपर्‍यात त्याने त्याची सोयही केलेली आहे. इतरत्र कोठे घाण करत नाही.

हे ते आमचे गोड बाळ...

काल मात्र या मांजराने एक नवाच पराक्रम केला. दुपारच्या वेळी त्याने घशातून चित्र विचित्र आवाज काढायला सुरुवात केली. जोरजोराने आचके दिले आणि खिडकीतून बाहेर त्याला ठेवायच्या आतच भक्कन उलटी करुन ते मोकळे झाले.

टिपिकल अ‍ॅसिडिक गंध दरवळला.. डॉक्टर मंडळीना हा गंध नवा नाही.

आणि त्याने जे काही ओकले, ते बघताच मलाच उलटी आल्यासारखे वाटले.

त्यात एक मोठा जंत वळवळत होता. !!!!!! नेमॅटोड जातीचा मोठा जिवंत जंत !!! डॉक्टरी शिकताना असले अनेक विविध जंत बाटलीत पाहिले होते. पण जिवंत नेम्याटोड - तोही तोंडातून बाहेर आलेला प्रथमच पाहिला आणि धन्य झालो. जंत शक्यतो खालच्या मार्गाने बाहेर जातात.. पण अगदी क्वचित, उलटा प्रवास म्हणजे रिट्रोग्रेड जर्नी करून तोंडातूनही बाहेर पडू शकतात.

एव्हाना त्याचे आचकेही कमी झाले होते. त्याला खिडकीतून बाहेर ठेवले, नंतरची उलटी त्याने बाहेरच केली.

जंत मात्र घरातच होता. एका अपृष्ठवंशीय - अंडज प्राण्याने दोन पृष्ठवंशीय- सस्तन प्राण्यांचे प्राण कंठाशी आणले. !!! जंत काही क्षणातच मेला, मग त्यालाही बाहेर टाकले.

नंतर काही वेळाने नेहमीच्या कोपर्‍यात आणखी दोन जंत मिळाले! तेही टाकले. सध्या मांजर व्यवस्थीत आहे. ( ?)

या प्रकाराने मी मात्र सुन्न झालो. माणसामध्ये लहान बाळात एक वर्षापर्यंत जंत होत नाहीत. कारण माणसाचे बाळ मातीच्या संपर्कात नसते... पण मांजराची ( कुत्र्याची आई ) मात्र मातीत फिरणार आणि नंतर पिल्ले तिला चाटणार ! त्यामुळे प्राण्याम्मध्ये मात्र सहा महिन्यांच्या आतच ( तेही बहुतेक सर्वच पिलांमध्ये !!!!!! ) जंत आढळतात, असे गुगलबुवाने सांगितले.

मांजराबरोबरच आता मलाही ट्रीटमेंट घेणे गरजेचे आहे. स्वतःसाठी एक अल्बेन्ड्याझोल टेब्लेट पुरेशी आहे.

पण मांजराचं काय करु?? पाव किलो वजनाचे, ३ महिन्याचे ते बाळ !!! त्याला कोणते जंत नाशक वापरू??? घरात कुत्रा, मांजर असलेल्या सर्वच लोकानी प्राणी आणि घरचे लोक याना नियमित जंतनाशक देणे आवश्यक आहे. याबाबत कुणाचे काही अनुभव आहेत का???

लक्षात ठेवा, जंताची अंडी मातीत वर्षानुवर्षे रहातात... मांजर, कुत्रे यांची घाण त्वरीत काढून टाकणे आणि तिथे एखादे जंतुनाशक टाकणे, आवश्यक आहे. ( पण जंताची अंडी बहुतांश जंतुनाशक औषधानी मरत नाहीत, हेही खरेच आहे! )

जंताचे चित्र गुगलवरून घेतले आहे.

घरच्या कुत्र्या मांजरांची काळजी असा एक विभाग सुरु करावा. याच धाग्यावर चर्चा केलीत तरी चालेल.