माझ्या त्या साऱ्या कविता....

Submitted by रसप on 21 August, 2012 - 00:15

'मराठी कविता समूहा'च्या 'ओळीवरून कविता - भाग ९९' मधील माझा सहभाग -

आठवती का सांग तुला मी
लिहिलेल्या पहिल्या ओळी ?
नकळत सुचली होती कविता
अगदी साधी अन भोळी

तीच जी तुझ्या अजून दिसते
गालावरच्या खळीतुनी
डोळ्यांतुन चमचम करते वा
रुळून हसते बटीतुनी

हरकत नाही, विसरुन जा तू
पहिली कविता अल्लडशी
पन्नासावी आठवते का
जमली होती फक्कडशी ?

तुझ्या चालण्याची लय होती
धीमी पण दिलखेच अशी
तुझ्याप्रमाणे नटली सजली
तुझी हुबेहुब छबी जशी

नाही ना? मज ठाऊक होते
नाही आठवणार तुला..
गंध स्वत:चा किती पसरला
कळतच नसते कधी फुलां

वाहत होती अखंड सरिता
कवितांची झुळझुळणारी
कधी तुझ्या निर्व्याज हसूसम
उथळ तरी खळखळणारी

आता केवळ पात्र कोरडे
आटुन गेली ती सरिता
आज तुला मी अर्पण करतो
माझ्या त्या साऱ्या कविता....
............... आज तुला मी अर्पण करतो
............... माझ्या त्या साऱ्या कविता....

....रसप....
२० ऑगस्ट २०१२
http://www.ranjeetparadkar.com/2012/08/blog-post_21.html

विषय:

काव्यलेखन

Groups audience:

गुलमोहर - कविता

Group content visibility:

Public - accessible to all site users

शेअर करा