दिवाळी अंक २०११

बरं झालं हे सुरू केलंत ते.
माझे अजून घ्यायचेत अंक. आणि लायब्ररीही आहे. लिस्ट होऊन जाईल.

मी उत्तम कथा वाचला. ठिक आहे. काही कथा जाम सो सो. काही बर्‍या.

सत्यदेव दुबेंवर चक्क पाच लेख आहेत....<< चक्क का? पद्मभूषण मिळालं यावर्षी त्यांना हे माहित नाही का? ते महत्वाचं नाहीये? FYI मराठी थिएटरसंदर्भात पण भरपूर काम केलंय त्यांनी.

धन्यवाद भरत.
यावर्षी अजून काहीच वाचून झाले नाहीत अंक. आत्ताशी बोलावलेत.

मयेकर, 'वळवूया' ना?

नुसतेच घेतलेत अंक. अजून एकही वाचलेला नाही.

कालनिर्णयच्या अंकात एम एफ हुसेन यांच्यावर लेख आहे(त). त्यांची काही चित्रेही.
लोकसत्ताचा ह्यावेळचा अंक आवडला. लेख, मुलाखती चांगल्या वाटताहेत.
अनुभवचा अंकही चांगला वाटतो आहे.

अजूनही घेतलेत, पण धड चाळायलाही झाले नाहीयेत, तेह्वा थोडंफार वाचून झाल्यावर काय काय आवडलं हे लिहिते. अंतर्नादचा दिवाळी अंक घ्यायचा आहे अजून. दोनदा चौकशी केली, तोवर आला नव्हता. आता आला असावा.

ह्या वेळी दिअंच्या किंमती कायच्या काय आहेत

माझे दिवाळी अंक रत्नागिरीत घेतलेत. कुठले वाचणेबल आहेत ते इथे बघून ठरवेन आणि इकडे मागवेन.

मायबोलीवर दिवाळी अंकाची खरेदी काय अजून जमतच नाहिये.

''आकंठ'' दिवाळी अंक यंदाचा हिंदी कथा विशेषांक आहे.

हिंदीतील सर्वोत्तम कथा अनुवादित करुन वाचकांसाठी सादर केल्या आहेत.
या आधी,उर्दू,तामिळ्,गुजराती,बंगाली विशेषांक अगदी संग्राह्य झाले आहेत.

आकंठ च्या यंदाच्या अंकात मी यशपाल यांची ''ज्ञानदान'' ही कथा अनुवादित केली आहे.
किंमत ७५ रुपये.

संपादक---- रंगनाथ चोरमुले
कार्यकारी संपादक.---- डॉ.राम पंडीत

मौज, कथाश्री कुणी वाचले का ?

मौज आजच आलाय माझ्याकडे. वाचला नाही अजून. मधु मंगेश कर्णिक, संजीव लाटकर, भारत सासणे, विजया राजाध्यक्ष यांच्या कथा दिसत आहेत. कविता खूप आहेत. पन्नासेक. त्यात प्रथितयश पण. 'बदलता समाज..' वरचा मोठा परिसंवाद दिसत आहे. मागच्या दोन्ही वर्षांपेक्षा यावेळचा मौज बरा वाटतो आहे.

अनुभव, अक्षर, किस्त्रीम, दीपावली इ. पण आलेत. अजून बघितले नाही.

अरे वा, म्हणजे राखुन ठेवायला हवा
साजिरा,
बाकी वाचलेस की ते पण सांग
धन्यवाद.

कालनिर्णय नक्की घेणार.
लोकसत्ताने निराशा केलेली मागल्या वेळेस. शैलजा, थोडे डिटेल्स देणार काय?

हो, आरती.

--

युनिक फीचर्सचा 'अनुभव' नेहमीच नावाला जागणारा असतो. विश्वास पाटलांनी मात्र थोडी निराशा केली (चीन- युआन श्वांग, शांघाय, शियॉन). त्याच विषयावर लिहिलेल्या निळू दामलेंकडून फार अपेक्षा नाहीत. पण वाचायला हवं. (लवासा विचारसरणीची कल्पना तरी येईल. असंही, 'आपला प्रॉब्लेम तरी काय, राजेहो' असंच काही तरी शीर्षक आहे.)

'अनुभव'चा संपूर्ण 'कलर्ड-ग्लेझ्ड' अंक हाताळायला बरं वाटतंय. इतर अंकांनो, पाने पाहिजे तर थोडी कमी असू देत, फॉन्ट अजून किंचित लहान असू देत, किंमत पाहिजे तर पाचदहा रुपये जास्त असू देत, लेखकांबाबत थोडेफार नवीन प्रयोग असू देत; पण नवीन वाचक येऊ देत. तुमचे अंक वर्षानुवर्षे आवडणारी पिढी जुनी झाली, नामशेष झाली, तर काय करणार तुम्ही? जुनं 'महात्म्य' वगैरेला आंजारत गोंजारत मोठे दिवाळी अंक (कमीत कमी दृष्य रूप) बदलत नाहीत, याची चिंता वाटतेय. आपल्याला वाटून काही फायदा नाही, त्यांना वाटली पाहिजे. सत्यकथासारखे लोप पावले, यांची काय कथा?

'दिवाळी अंकांचे अर्थकारण' हा महत्वाचा भाग आहे, हे मान्य आहे.

तुमचे अंक वर्षानुवर्षे आवडणारी पिढी जुनी झाली, नामशेष झाली, तर काय करणार तुम्ही? >>> अगदी. अगदी साजिरा.

साजिरा,लिहिते दोन एक दिवसांत नक्की.

>>> ऋतुरंगचा ’माझं जन्मघर विशेषांक’ आहे. पहिलाच लेख गुलजारचा. वाचताना राहून राहून, त्यांच्याच शब्दांत वाचायला आवडले असते असे वाटत राहते . . . एकाच विषयावरचे, ’आमच्या वेळी’ची प्रचंड लांबलेली तान असे वीसेक लेख सलग वाचणे मात्र अवघड आहे.

सहमत. सुरवातीचे २-३ लेख वाचल्यावर उरलेला अंक अतिशय कंटाळवाणा आहे.

"साप्ताहिक सकाळ"च्या अंकाची छपाई उत्तम आहे, पण १-२ लेख वगळता अंक फारसा चांगला नाही. बाकी अजून वाचले नाहीत.

>>त्या पक्ष्याचा थरकाप उडवीत, त्याच्या फूटभर इतके जवळ जाऊन त्यांनी आपले पक्षीप्रेम सिद्ध >>

साप्ताहिक सकाळचा अंक चाळला. मुखपृष्ठावर ती दबंगवाली अभिनेत्री. !!
कागद चांगला आहे. एवढेच सांगण्यासारखे आहे.
पैसे घेऊन छापलेल्या काही जाहिरातींची छपाईसुद्धा चांगली नाही.

त्यात खालील उल्लेखनीय वाटले. अजून बाकीचे वाचते आहे.
- युनिक फीचर्सचा पुण्यातील मुठा नदीच्या प्रदुषणावरचा लेख.
- पद्मिनी बिनीवाले यांचे 'बाळघर' आणि मल्लिका अमरशेख यांचे लेखन

रहस्यकथा, गूढकथा इ. च्या चाहत्यांसाठी असलेला "धनंजय" वाचला.
कथा ठीकठीकच आहेत पण त्यात एक (माझ्यासाठी तरी नविन ) कथा प्रकार "फ्लॅश फिक्षन" वाचला.

फ्लॅश फिक्शनः चमकुन, उडुन जाणार्‍या फ्लॅश सारखी ती कथा एका नजरेतुन वाचुन झाली पाहिजे. टप्प्याटप्प्याने वाचायची गरज पडता कामा नये. नजरेच्या एका टप्प्यात येइल असा तिचा आकार असावा-शक्यतो १००० शब्दाच्या आत. पण कथेचे सर्व निकष सांभाळले गेलेच पाहिजेत..कथाविषय पाहिजे, पात्रे पाहिजेत, प्रसंग आणि प्रसंगानुरुप संवाद, वर्णन पाहिजे, भावभावना पाहिजेत आणि जी कल्पना मांडायची ती तेवढ्या शब्दात वाचकांपर्यंत संपुर्णपणे पोहोचलीच पाहिजे.
अधिक माहितीसाठी पुढील वेबसाईट्स दिलेल्या आहेतः
www.flashfictiononline.com
www.bestsciencefictionstories.com
www.anotherrealm.com
www.55fiction.com

मेघश्री दळवी या लेखिकेच्या उद्या (१००० शब्द) , निळाई (५०० शब्द), खेळ (१९० शब्द) या विज्ञानकथा आहेत. मला तरी आवडल्या.

नोटः इतका अवांतर फापटपसारा लिहिण्याचे (स्वार्थी) कारण..जर या नवीन कथा प्रकारासाठी मायबोलीने काही उपक्रम केला तर आम्हाला चांगल्या कथा इथे वाचायला मिळतील

चिन्हचा नग्नता विशेषांक अप्रतिमच आहे. अगदी संग्रही ठेवावा असा. उत्तम प्रकारे छापलेली अनेक महत्वाची पेंटींग्ज असल्याने किंमत जास्त असणारच आहे पण तरी टोटली वर्थ इट. तो दिवाळी अंक कुठेय पण? जुलैमधे प्रसिद्ध झाला होता तो. माझी कॉपी ऑगस्टमधे आली माझ्याकडे. वार्षिक एक अंक असतो त्यांचा दृश्य कलासंदर्भाने एकेका विषयाला घेऊन.

भरत

माहेरचा अंक बराचसा वाचला.
इरावती कुलकर्णी म्हणजे आपली अरुंधती का? आरतीताईंची मुलाखत घेतली आहे. काही भाग आवडला.
साजिर्‍याची 'दरजा'कथा सुरेख नेहमीप्रमाणेच.
नीरजाची कथाही छान. लेखनाची क्रिया किती एकमितीय असते. अवघड असते ते उतरवून काढणे. चिन्मयचा लेख छान.
कलापिनी कोमकलींच्या आठवणी आवडल्या. राहुल देशपांडेच्याही. प्रामाणिक सूर वाटला, तो भावला.
कुंडलकरांचे स्वतःच्या आत्महत्येच्या प्रयत्नावरील 'फिक्षन' ची शैली अफाट आहे.. मस्ट रीड. त्यात मध्येच चौकटीत 'मेनकाची' जाहिरात. काहीही...
मंगला गोडबोल्यांची कथा आवडली.
आनंद बंग यांचा लेख वाचनीय.
गीतांजली (अतुल) कुलकर्णी यांनी घेतलेला सहजीवनाचा वेध घिसापिटा नव्हता. त्यामुळे फारच वाचनीय. दोघेही इंट्रेस्टिंग आहेत. त्यांचे ग्रीन लाईफस्टाईल स्वीकारण्याचे धैर्य आवडले.

एकंदरित अंक छानच. बर्‍याच वर्षांनंतर 'माहेर' वाचला असेन. ते सुद्धा मायबोलीकरांमुळे. मुखपृष्ठ तेवढे बोर वाटले.

>इरावती कुलकर्णी म्हणजे आपली अरुंधती का? आरतीताईंची मुलाखत घेतली आहे. काही भाग आवडला. > मलाही अरुच वाटली.
कलापिनी कोमकली ह्यांचे कथनही आवडले. ह्या अंकातले अजून इतकेच झालेय वाचून. ह्या वर्षी फारच बॅकलॉग राहतो आहे.
>मुखपृष्ठ तेवढे बोर वाटले. >> हो.

भरतना अनुमोदन.
'मिळून सार्‍याजणी' च्या अंकातील वेश्याव्यवसायावरील विशेष विभाग उत्कृष्ट झाला आहे. याला म्हणतात काम, एखाद्या विषयाचा आढावा. वाचकाला तुच्छ न लेखता तरीही सत्य मांडण्याचे, डोळे उघडवण्याचे कसब आहे त्याला _/\_
विशेष विभागाचे संपादक- उत्पल चंदावार. टेरिफिक काम झालं आहे.
-वर भरतने नमुद केलेला मनीषा गुप्तेंचा 'वेश्याव्यवसाय व कुटुंबव्यवस्था: पितृसत्तेच्या नाण्याच्या दोन बाजू' हा लेख अफाट आहे. तो लेख वाचला आणि गरगरले अक्षरश:
- मंगला सामंतांचा 'वैश्यांमागील भारतीय रहस्ये' हा लेख मला जरा स्त्रीवादाच्या काहीश्या भरात लिहील्यासारखा वाटला. पटला नाही. त्यात काही कच्चे दुवेही वाटले. कदाचित पूर्वसंस्कार, शिकलेला इतिहास पुसायची माझी कुवत नसावी.
-डॉक्टर कुलकर्ण्यांचा एडस वरील लेख आणि आढावा चांगला वाटला.
-मीना शेषु यांचा 'ते सुरवातीचे दिवस..' यात सांगलीकर्‍हाड मधील वेश्याप्रश्न सामाजिक कार्यकर्ती म्हणून हाताळतानाचे अनुभव, अतिशय प्रामाणिक, अभिनिवेशविरहीत वाटला. फार आवडला.
-सुषमा देशपांड्यांचा नाटक बसवतानाचा ठिक.
- डॉ साहनींचा 'गरीबी, श्रमबाजार आणि वेश्याव्यवसाय' यात आकडेवारीसंदर्भात जे मांडले आहे ते डोळे उघडणारा आहे.
- रेखा देशपांड्यांचा 'चंद्रमुखीच्या प्रदेशात' वरवरचा वाटला अगदी. त्या मानाने संगीता ढमढेरेंचा 'माध्यमातील सेक्सवर्कर. भोंगळ विधाने, ठोकळबाज चित्रण' हा चांगला वाटला.

डॉ संजीवनी कुलकर्णींनी करुन दिलेला माधुरी पुरंदरेंचा परिचय, त्यांच्या कार्याचा आढावा सुरेख आहे.
आढावा समीक्षकी नाही, आवही नाही, त्यामुळे तो हृदयाला हात घालतो. शंभरापैकी ९०. (जराssशिक साखर कमी चालली असती. ) पण माधुरीताईंबद्दलची काही वाक्य केवळ फ्रेम करुन लावावीत अशी आहेत. त्यांच्यासारखे एक जरी पुस्तक लिहीता आले, एक जरी गाणे गाता आले, तर मी धन्य होईन.
' ती करते ते नेहमीच नेमकं, सुंदर, विलक्षण, असं कसं असतं ?' या पहिल्या वाक्यापासून अनुमोदन.

आणि संपादकीय कसे असावे याचादेखील वस्तुपाठ आहे.

संजयपवारांवरील लेख 'कल्पकतेचा आधुनिक प्रवास' बोर वाटला. काहीच नाविन्य नाही. ठोकळेबाज.

' ती करते ते नेहमीच नेमकं, सुंदर, विलक्षण, असं कसं असतं ?' <<<
अंक वाचला नाहीये पण माधुरीताईंना जेवढं अनुभवलंय तेवढ्यावरून हे वाक्य करोडो मोदकांच्या क्वालिटीचं आहे.

अक्षरचा अंक अर्धा तरी वाचून झालाय. उत्तम आहे.
मीनाने गौतम राजाध्यक्षांवर लिहिलंय ते अप्रतिम आहे.

मी अजून कुठलाच दिवाळी अंक वाचला नाहीये. अक्षरचा अंक चाळला होता, त्यात 'सागरीका घोष' यांचा लेख खूप छान आहे. सगळ्यांनी वाचावाच असा आहे.

अजून तिथवर नाही पोचलेय.