हमीभाव

कशाशी न देणे कशाशी न घेणे
कशासाठी हे गळी लोढणे

जगण्यास जेथे हमीभाव नाही
कशासाठी हे हवे जन्मणे

कुठे नेतसे ना फुटे वाट नुसती
कशासाठी ही उरस्फोड करणे

जिथे चंद्र ही ना रंजवे मनाला
कशासाठी हे हवे चांदणे

असे फक्त पाणी डोळ्यास जेथे
कशासाठी ही हवी रांजणे

तुला पाहता न येते आताशा
कशासाठी ही हवी दर्पणे

सत्वहीन नुसती इथे माणसे
कशाला हवे वेगळे मारणे

उदासीच जेथे व्यापे मनाला
कशाला हवे समजावणे

नागवेच जेथे उभे सत्य आहे
कशासाठी हे हवे लाजणे

आजपासून (१ जून) राज्यातले शेतकरी संपावर जात आहेत.कदाचित राज्यातील शेतकरी संपावर जाण्याची ही पहिलीच वेळ असावी

काय आहेत संपावर जाणार्‍या शेतकर्‍यांच्या प्रमुख मागण्या ?

१) शेतकर्‍यांची सरसकट कर्जमाफी करुन सातबारा कोरा करावा.

२) स्वामिनाथन आयोगाच्या शिफारशींची अंमलबजावनी करावी.

३) शेतीमालाला उत्पादन खर्चाच्या दीडपट हमीभाव मिळावा.

४) शेतीसाठी बिनव्याजी कर्जपुरवठा करावा.

५) शेतकर्‍यांना वयाच्या साठ वर्षानंतर पेन्शन योजना लागू करावी.

६) दुधाला प्रतिलिटर ५० रु. भाव मिळावा.

७) शेतीसाठी अखंडित व मोफत वीजपुरवठी करावा.