आता तरी स्वत:चं असं जगून घ्यावं म्हणतो

माझ्या असण्यातलं मर्म कळून घ्यावं म्हणतो
आता तरी स्वत:चं असं जगून घ्यावं म्हणतो

उरलेत मनात काही आभास काही पुरावे
काही शब्दांचे तर काही निशब्द दुरावे
शब्दांमधूनच त्यांना सांधून घ्यावं म्हणतो
आता तरी स्वत:चं असं जगून घ्यावं म्हणतो

आहेत काही कोमेजलेली फुलं, सुकलेली फळं
आहेत वणव्याच्या भितीने बुजलेली बिळं
वणव्यात स्वत:च्याच जळून घ्यावं म्हणतो
आता तरी स्वत:चं असं जगून घ्यावं म्हणतो

तशी जगण्याला रोज सारखिच गति आहे
थांबलो की संपलो.. अनामिक भिती आहे
आज जरा वेगळ्या वाटेने वळून घ्यावं म्हणतो
आता तरी स्वत:चं असं जगून घ्यावं म्हणतो

आहे कुठेतरी देहात एक ओथंबलेला श्वास
अन निश्वासाच्या शोधात ओढावलेला त्रास
तरी एका मोकळ्या श्वासानं हसून घ्यावं म्हणतो
आता तरी स्वत:चं असं जगून घ्यावं म्हणतो

तशी जीवनाशी जिंकण्याची सवय लागली आहे
दुनियाही आत्तापर्यंत मनासारखी वागली आहे
आता निदान स्वत:शीतरी हरून घ्यावं म्हणतो
आता तरी स्वत:चं असं जगून घ्यावं म्हणतो