आरश्या अंतरी आरसा पाहिजे

आरश्या अंतरी आरसा पाहिजे
काळजाचा सुध्दा कवडसा पाहिजे

बघ तुझ्या भोवती फक्त रांगेल ती
एक पापा तिला गोडसा पाहिजे

लाट येईल ती उसळुनी भेटण्या
बस किनाऱ्यावरी भरवसा पाहिजे

दोन डोळ्यां सवे पंचइंद्रे दिली
काय अजुनी तुला माणसा पाहिजे

येत जा भेटण्या माळुनी तारका
साज शृंगारही छानसा पाहिजे

बोलतो वागतो बघ तुझ्या सारखा
मी असा तुज नको मग कसा पाहिजे

विश्वशांती हवी जर जगा तारण्या
शाक्य बुध्दा परी वारसा पाहिजे
जीजी