भास

Submitted by द्वैत on 31 March, 2025 - 01:44

भास

दिवे विझताना नको
सावलीला ठेवू मागे
अंधाराच्या पोकळीत
कोणीतरी असे जागे

कोण असे कोण जाणे
त्याला नाही रंगरूप
जाणे कोणत्या जन्मीचा
भोगतसे अभिशाप

शाप म्हणा किंवा दान
त्याला नाही देणे घेणे
राखायाचे त्याला त्याच्या
सुप्त नेणिवांचे लेणे

कधी कधी या लेण्याचा
धपापतो मंद श्वास
प्राक्तनाचे भोग म्हणे,
कुणी म्हणे खुळा भास

विषय: 
काव्यलेखन
Groups audience: 
गुलमोहर - कविता
Group content visibility: 
Public - accessible to all site users
शेअर करा