कधी पाऊस कधी ऊन

कुणी नाही तुझे माझे
अश्या परक्या गावातून
एक रस्ता शोधत फिरतो
कधी पाऊस कधी ऊन

कधी येतो झऱ्यापाशी
तुडवून पाचोळ्याच्या राशी
ताऱ्यांच्याही प्रहराआधी
कात टाकून, रानांतून
एक रस्ता शोधत फिरतो
कधी पाऊस कधी ऊन

कधी धावे सरळसोट
टाळून वळणे ठरलेली
बुजून गेलेल्या वाटांनी
खोल दरीत डोकावून
एक रस्ता शोधत फिरतो
कधी पाऊस कधी ऊन

कधी फिरतो माघारी मग
क्षितिजाची पाहून तगमग
रंगबिरंगी पंख पिसांचे
कोशामध्ये गुंडाळून
एक रस्ता शोधत फिरतो
कधी पाऊस कधी ऊन

कुणी नाही तुझे माझे
अश्या परक्या गावातून
एक रस्ता शोधत फिरतो
कधी पाऊस कधी ऊन