तुरीची झणझणीत आमटी- विदर्भ स्पेशल (भारत का दिल देखो)

एका लोखंडी कढईत ४ थेंब तेल घालून त्यावर जिरे, हिरव्या मिरच्या, आले व लसणाच्या कळ्या भाजून घ्याव्या. हे करताना त्यावर किंचित (चिमूटभर) मीठ भुरभुरावे. असे केल्याने कोणताही जिन्नस खमंग भाजला जातो. लसूण लाल झाला कि त्यातच तुरीचे सोललेले दाणे घालून दाण्यावर डाग दिसेपर्यंत परतावे.
जरा थंड झाल्यावर त्यात बचकभर कोथिंबीर घालून मिक्सरला जाडसर भरड वाटून घ्यावे. गरज पडल्यास थोडे पाणी घालावे व ओलसर पेस्ट करून घ्यावी.
आता त्याच कढईत नेहमीच्या भाजीला वापरता त्यापेक्षा चमचाभर अधिक तेल गरम करावे. त्यात मोहरी, हिंगाची फोडणी करून घ्यावी. यात बारीक चिरलेला कांदा घालावा. कांदा लाल होईपर्यंत परतावा पण जळू देऊ नये. आता त्यात बारीक चिरलेला टोमॅटो घालावा. हळद, लाल तिखट, धणेपूड, गरम मसाला, मीठ व मटण मसाला घालून माध्यम आचेवर तेल सुटेपर्यंत परतावे. टोमॅटोच्या फोडी दिशेनाश्या होऊन सारे मसाले एकजीव झाले कि यात तुरीच्या दाण्यांची पेस्ट घालून मध्यम आचेवरच २ मिनिटे परतावे. हे मिश्रण नीट शिजले कि कढईपासून सुटून येते (परतताना अजिबात भांड्याला चिकटत नाही).
या स्टेजला कडकडीत गरम पाणी घालून उकळी आणावी. आपल्याला रस्सा जितक्या प्रमाणात दाट/पातळ हवा असेल त्यानुसार पाण्याचे प्रमाण असावे.
२ मिनिटे मध्यम आचेवर उकळी आली कि झाकण ठेऊन १ मिनिट कमी आचेवर शिजवावे (व गॅस बंद करावा ) .

वऱ्हाडी पद्धतीची तुरीची आमटी तयार आहे. ज्वारीच्या भाकरीसोबत ओरपून / काला मोडून किंवा गरम गरम वाफेवरल्या भातासोबत खावी.