प्रतिबिंब

प्रतिबिंब

डोळ्यांनी अन् ओठांनी केलेला करार आहे
मी अश्रू अन् हास्याला मौनाने जिंकू पाहे
जगणे सोपे असताना मी हिशेब कसला करते
हे श्वास दिले देवाने मी उगा उसासे भरते

ही निर्मळ सृष्टी भवती मी डोळे भरून बघते
कामाच्या काचा मध्ये परि आनंदाला मुकते
सोडले व्यक्त मी होणे हसतेही कामा पुरते
दिसलेच दैन्य जर कोठे मी डोळे मिटून घेते

चेहरा खुशीचा खोटा मी खुशाल धारण करते
खोट्या नश्वर गोष्टींना मी माझे माझे म्हणते
खोटे जगणे मग माझे का हवे हवेसे वाटे?
अंतरी खोल मन माझे का माझे मलाच खाते?

बेगडी अश्या जगण्याचा येतो मलाच मग वीट
आश्वस्त मला मी करते की होइल सारे नीट
आरसा मनीचा जेव्हा प्रतिबिंब दावतो माझे
बिंबातुनी मला दिसते मौनाचे माझ्या ओझे

डोळ्यांनी अन् ओठांनी केलेला करार आहे
मी अश्रू अन् हास्याला मौनाने जिंकू पाहे

डॉ. रोहिणी चंद्रात्रे वाघमारे