घेते दळून कविता...

घेते दळून कविता...

मजला हवीहवीशी, येते जुळून कविता
ओठी तुझ्या कशी अन् , जाते रुळून कविता

लोंढे निघून जाती, मी एकलाच उरतो
पाहून खिन्न मजला, येते वळून कविता

साऱ्या तरुण चिंता, बसती उशास माझ्या
शाईत मिसळुनी त्या, घेते गिळून कविता

मूर्च्छित भावनांना, घेते कवेत आणि
देऊन श्वास त्यांना, जाते जळून कविता

तो का सदैव हसरा?, तो का सदैव कष्टी?
पडतात प्रश्न त्यांना, येते कळून कविता

घेतो तुला लिहाया, जातो वसंत वाया
फाडून कल्पनेला, जाते छळून कविता

डोळ्यात वेचलेले, जात्यात घालतो मी
जात्यात अनुभवांना, घेते दळून कविता