कुण्या कवितेची ओळ

Submitted by अनन्त्_यात्री on 11 September, 2024 - 00:22

निबिडात दडलेल्या
निळ्याभोर पाखराची
लवलवती लकेर
जेव्हा कानावर येते....

निळ्यासावळ्या निर्झरा
फेसाळत, कवळून
पाणभोवर्‍याची माया
जेव्हा पैंजण बांधते...

मावळतीच्या बिलोरी
आभाळाला तोलूनिया
एक इवले पाखरू
जेव्हा पंखावर घेते...

काजळल्या नभावर
निळी रेष रेखाटत
दिशा, कोन झुगारून
जेव्हा उल्का कोसळते....

.....काळजात रुजलेल्या
कुण्या कवितेची ओळ
ध्यानीमनी नसताना
तेव्हा ओठावर येते

विषय: 
निसर्ग
Groups audience: 
कवि आणि कविता
Group content visibility: 
Use group defaults
शेअर करा

सुंदर...

Submitted by दत्तात्रय साळुंके on 11 September, 2024 - 11:49

निव्वळ सुंदर आहे.
किंवा उलटेही होते एखादी कविता वाचताना, वरील गोष्टी आठवतात, अनुभवल्या जातात Happy

Submitted by सामो on 12 September, 2024 - 06:56