तुला सांगायच्या राहून गेल्या भावना माझ्या

एका गझल कार्यशाळेतील सदस्यांना सरावासाठी दिलेल्या माझ्या तरही मिसऱ्यावर मीच रचलेली एक गझल
=====

तुझ्यापासून तर निर्माण झाल्या... पण मना माझ्या
तुला सांगायच्या राहून गेल्या भावना माझ्या

जगाला स्वर्ग करण्याची तयारी ठेवली होती
कुणी ऐकून घेणारेच नव्हते कल्पना माझ्या

असे बोलून ती ऐकायलाही थांबली नाही
"चुका काढायच्या असतील तितक्या काढ ना माझ्या"

'भले होवो' म्हणालो तर नको त्यांचे भले झाले
कुठे पोचायच्या त्या कोण जाणे प्रार्थना माझ्या

तुला ओझे, मला ओझे, कशाला पाहिजे मैत्री
जुन्या मित्रास आवडल्या नव्या संकल्पना माझ्या

रडवता रोज... हसलो तर नि हसता रोज रडलो की
निराळी औषधे तुमची, निराळ्या वेदना माझ्या

मने जिंकून घेण्याचे जसे मी यत्न थांबवले
मने मी जिंकलो, झाल्या खऱ्या त्या वल्गना माझ्या

घरी नाही, घराबाहेरही नाही तुला आदर
कुठे मी सांग नेऊ 'बेफिकिर' या जीवना माझ्या

=====

-'बेफिकीर' (२१.०८.२०२४)