इतकी खरी

आज सहजच लक्ष गेलं माझं
रंगवलेल्या नखांकडे...पायाच्या
इतकी नखरेल तर कधीच नव्हती

निमुळत्या होत जाणाऱ्या पायांना
सतेज केळी कर्दळीची उपमा..
इतकी सोज्वळ कधीच नव्हती

हलकेच गोंजारून चाचपून बघताना
हात अन् पोटात नाजूक शक्तीची
इतकी लटकी चढाओढ कधीच नव्हती

थोडेसे उलून अधिकच गुलाबी झालेल्या
ओठांनी केलेली अखंड कुजबुज
इतकी गुपचूप कधीच नव्हती

श्वासात येणारी ही गंधित हवा
हवेत मिसळलेल्या सुरावटी
चहूकडे सुंदर प्रेमळ सृष्टी
यातली इतकी खरी माझी मी

... फक्त तुला भेटल्यानंतर.