https://www.maayboli.com/node/85078 -भाग २
उपासना !
भाग -3
... अर्ध्या वाटेवर गेलो असेंन नसेन तितक्यात शालू मला धावत येताना दिसली , सगळ्या अंगावर चिखल माखलेला कळत होतं , कपडे चिखलाने भरलेले ,पडल्या बिडल्या की काय या दोघी ? कुठे लागलं बिगलं तर दवाखानाही नाही आसपास , मनात नाही नाही ते विचार येतच होते तोच मला बघू शालूने जोरात हंबरडा फोडला , “ कृष्णा दादा SSSSSSS !. “ त्याबरोबर अंगावर सर्रकन काटा आला ,मी अजून स्पीड वाढवत धावत तिच्यापर्यंत पोहोचलो . “कियारा कुठे आहे ? “ मी धापा टाकत तिला विचारलं ,ती मोठ्याने रडत होती .
“बोल ना SSS कुठे आहे किया SSSS ? “माझा आवाज वाढला तसं पांदीच्या मागच्या बाजूच्या झाडीच्या दिशेने तिने बोट दाखवलं आणि स्फुंदून स्फुंदून ती रडू लागली , मी जोरात पळत आतल्या बाजूला गेलो आणि समोर ते भयानक दृश्य , जे नंतर कित्येक दिवस माझ्या डोळ्यांसमोरून हलत नव्हतं , फार फार प्रयास पडले मला ते विसरायला . समोर कियारा अस्तव्यस्त पडली होती , अंगावरचे कपडे फाटलेले , कमरेखालचा भाग उघडा पडलेला , त्या अंधारातही तिची गोरी कांती झळझळुन दिसत होती ,वेदना , अपमान , शरम . भीती या सगळ्या भावनांचा एकाच वेळी मनात कल्लोळ उठला ,कसे तरी तिचे कपडे सावरले , दोन्ही हातांवर तिला उचलली आणि घराकडे निघालो . “किया माझ्या बाळा काय झालं गं हे , कोणा नराधमाने तुझी अशी अवस्था केली गं ? मोठ्याने आक्रन्दत मी घराकडे निघालो होतो , भेदरलेली शालू माझ्यामागे रडत येत होती, वाटेत लागलेल्या विहिरीत तिच्या सकट उडी मारावी असे खूप वाटून गेले पण खूप आवर घातला मनाला . कसाबसा घरी आलो , आम्हाला असे बघून घरी सगळ्यांचेच धाबे दणाणलेले . आता कियारा च्या आई वडिलांना काय जबाब द्यायचा ? कोणाचं असेल हे नीच आणि अधम कृत्य ? आता काय करायचं ? माय आबा सगळेच रडायला लागले , शालू ला खोदून खोदून विचारले तर तिचे एकच उत्तर , पांदीजवळच्या ओहोळात नवीन रंगीत मासे आले होते , कियाराला ते मासे बघायचे होते म्हणून , आम्ही पांदीकडे गेलो , तिथे पोहोचलो आणि मासे बघत होतो , अंधार पडायला लागला म्हणून निघणार तेव्हाच कुठला तरी वास भंपकन माझ्या नाकात शिरला आणि पुढे काय झालं मला कळलं नाही , शुद्ध आली तेव्हा ती चिखलात पडली होती आणि कियारा तिच्या सोबत नव्हती , कसे बसे उठून ती कियाराला शोधू लागली आणि तिला कियारा बेशुद्ध पडलेली नको त्या अवस्थेत दिसली , ते बघून घाबरून ती घराकडे यायला निघाली तोच मी तिला येताना दिसलो .
कियारा अजूनही बेशुद्ध होती , तसेच तिला गाडीवर घातले मागे शालूला बसवली ,अन्याची बाईक घेऊन आलो , कियारा ला कसे बसे माझ्या आणि शालूच्या मध्ये बसवून सुसाट तालुक्याच्या दवाखान्यात घेऊन गेलो . ईमर्जन्सी बघून डॉक्टरांनी कियाराला ताबडतोब टेबल वर घेतले , पडदे सरकवले आणि तपासणी चालू केली शालूच्याही डोक्याला थोडा मार लागला होता तिलाही ड्रेसिंग चालू होते म्हणून मी तिच्या टेबल जवळ उभा होतो , तितक्यात … “ च च ...अरेरे काय अवस्था केलीये रे या मुलीची , किती जखमा झाल्या आहेत, डोक्याच्या मागच्या बाजूलाही मार लागलेला दिसतो बेशुद्ध असतानाच त्याच अवस्थेत बलात्कार झालेला दिसतोय भयंकर आहे .. , !!!... “
डॉक्टरांचे ते शब्द तप्त शिशासारखे माझ्या कानावर पडले ,त्याक्षणी मस्तकात सणकन कळ उठली , कोण असेल तो नीच ? हाताच्या मुठी वळायला लागल्या , दात ओठ आवळले गेले ,”तितक्यात कियाराचा कण्हण्याचा आवाज आला “ ती शुद्धीवर येत होती , मला तिला तोंड दाखवायचीही लाज वाटू लागली , खूप यातना झाल्या मनाला . कियारा शुद्धीवर आली खरी पण ही माझी कियारा नव्हती , तिच्या डोळ्यात पूर्ण अनोळखी भाव होते , कोणीही समोर गेलं की खूप आक्रोश करत होती त्याचवेळी मोठ्याने रडत होती ,आता भीती जाईपर्यंत ही अशीच ओरडणार . दोन -तीन नर्सेस धावत आल्या त्यांनी पटकन एक सिडेटिव्ह दिलं . मी वेगाने बाहेर आलो , कियाराच्या आई -बाबांच्या नजरेला नजर कसा देणार होतो मी ? विचार करून माझ्या तोंडचं पाणी पळालं काय करू ? काय होऊन बसलं हे ? कोण असेल तो राक्षस ? त्या न पाहिलेल्या हरामखोराच्या विचारांनी मी त्वेषाने मुठी आवळत होतो .. तोच माझ्या खांद्यावर कोणीतरी हात ठेवला ,मी दचकून मागे वळून पाहिलं तर ते डॉक्टर कडुसकर होते , “ कृष्णा मी काय सांगतोय ऐक , कियाराचे आई -बाबा येतील , पोलीस येतील , व्हेरीफिकेशन होईल , जबाब नोंदणी होईल , तुला नाही नाही ते प्रश्न विचारतील , कदाचित तुलाच आरोपी ठरवून ,तुझ्यावर चार्ज लावून तुला खडी फोडायला पाठवू शकतील , तू तरुण आहेस एकदम डोक्यात राख घालून बोलू नकोस , आता येईल त्या प्रसंगाला धीराने तोंड दे , तुझी माय , बाबा , शालू , मंगेश सगळ्यांचा विचार कर ,आणि शालू तिच्यासोबत होती ना ? तीला म्हणावं नीट उत्तरं दे . जे झालं ते झालं त्याला काही ईलाज नाही , पण ईथुन पुढेच जास्त काळजी घेण्याची गरज आहे . Be brave !.. “
माझ्या डोळ्यात भीती दाटून आली ,हे काय आणखी नवीन संकट ? कियाराचे आई बाबा खरंच असं करतील ? हलकेच माझ्या खांद्यावर थोपटून डॉक्टर निघून गेले .
भयाण वळण
भयाण वळण
पुभा लगेच येणं आवश्यक...
अरेरे, खूप अनपेक्षित वळण दिलं
अरेरे, खूप अनपेक्षित वळण दिलं आहे कथेला
पुढील भागाच्या प्रतिक्षत
भयाण.पुभाप्र.
भयाण.पुभाप्र.
अरेरे
अरेरे
ह्या कथेचा पुढचा भाग आहे का?
ह्या कथेचा पुढचा भाग आहे का?