काय जीवीतास ह्या महत्त्व आहे

Submitted by हर्षल वैद्य on 23 October, 2023 - 04:50

कोण मी, काय माझे स्वत्व आहे
काय जीवीतास ह्या महत्त्व आहे

कोणती अदृश्य शक्ती चालवे मज
काय सर्वा अंतरीचे तत्त्व आहे

कोठुनी मी आणतो अवसान उसने
जाणतो जरि हे फुकाचे कवित्व आहे

काय असती प्रेरणा मम अंतरीच्या
दाटलेले घनतमी अंधत्व आहे

वाटते उधळून द्यावे सर्व संचित
पायी प्रपंच शृंखलांचे दास्यत्व आहे

केवढे गा लाभले मज पूर्वजांचे
केवढे अन् तोकडे कर्तृत्व आहे

जाणतो घेणे अता नाही भरारी
मालकीचे किंचित् असे अस्तित्व आहे

विषय: 
काव्यलेखन
Groups audience: 
गुलमोहर - गझल
Group content visibility: 
Use group defaults
शेअर करा