पाककृती स्पर्धा-१ - नारळी किन्वा - मानव

प्रथम किन्वा दोन वेळा व्यवस्थीत धुवून घ्या आणि निथळायला ठेवा.
एका भांड्यात नारळी दूध आणि त्यात अर्धा कप पाणी घालुन मंद आचेवर गरम करायला ठेवा. हे हाताला चटका लागे इतपत गरम करायचे मग गॅस बंद करायचा.
त्याच वेळी दुसरीकडे गॅस वर मध्यम आचेवर कढई तापत ठेवुन त्यात एक चमचा तूपावर काजु काप परतुन वेगळे काढुन ठेवा आणि मग बेदाणे थोडेच परतुन घ्या आणि बेदाणे वेगळे काढुन ठेवा.
परत एक चमचा तूप घालुन लवंगा घालुन परता. मग निथळलेला किन्वा त्यात घालुन दोन मिनिटे परता.

मग गॅस मंद करुन एका हाताने ढवळत त्यात गरम केलेले नारळ दूध + पाणी मिश्रण घाला. थोडा वेळ ढवळुन केशर घाला. आच मध्यम करा. आता नारळ दूध तापवले होते त्या भांड्यात दोन कप पाणी घालुन उकळायला ठेवा.

किन्व्यातील दूध उकळुन जरा घट्ट झाला की त्यात एक कप उकळते पाणी घाला, छान हलवुन झाकण लावुन किन्वा शिजु द्या. किन्वा शिजला की फुगतो आणि त्याची कोंबासारखी शेपटी दिसायला लागते. गरज वाटल्यास अजुन थोडे उकळते पाणी घाला. शिजला की आच मंद करा. आपल्याला अजुन खारीक पूड घालायची आहे. ती घातली की किन्वा अजुन घट्ट होईल तेव्हा किन्वा पूर्ण शिजला की तो सैलसर नसल्यास परत थोडे पाणी घालुन सैल करा.
मग थोडी थोडी खारीक पूड घालत छान मिसळुन घ्या. खारीक पूड वापरल्याने हा मोकळा होत नाही, जरा चिकटसर रहातो. पूर्ण पूड मिसळुन झाली की गॅस बंद करा, आणि अर्धे काजु आणि बेदाणे घालुन एकदा मिसळुन घ्या. खाताना आत मध्ये अनपेक्षीत काजु, बेदाणे आले की छान वाटते.
वाटीचा साचा करुन प्लेट मध्ये घेउन वरुन काजु काप बेदाणे यांनी सजवून सर्व्ह करा.