महिलादिनानिमित्त आढळणारे स्त्री-पुरुष भेदभाव आणि मतभेद!

महिलादिनानिमित्त आढळणारे स्त्री-पुरुष भेदभाव आणि मतभेद!

गेले काही वर्षे आमच्याकडे सातत्याने महिलादिन साजरा केला जातो.
आमच्याकडे म्हणजे आमच्या ऑफिसमध्ये.

कार्यक्रम साधारण असा असतो.

१) महिला कर्मचाऱ्यांनी ऑफिसमध्ये प्रवेश केल्या केल्या त्यांना गुलाबाचे फूल आणि भलामोठा पुष्पगुच्छ दिला जातो.

२) रिसेप्शनचा एक कोपरा छान सजवलेला असतो. जिथे त्यांचा छानसा फोटो काढला जातो.

३) भलामोठा पुषगुच्छ फोटो काढल्यावर परत घेतला जातो. परंतु गुलाबाचे फूल आपल्यासोबत नेता येते.

४) जागेवर जाताच तिथे त्यांच्यासाठी एक छानसे गिफ्ट त्यांची वाट बघत असते. त्याचे पर हेड बजेट पोरांच्या बड्डे पार्टीच्या रिटर्न गिफ्ट ईतके असते. चहा पिता पिता बायका तुला कुठला कलर आला, मला बाई ड्रेसला मॅचिंगच आला अश्या चर्चा करताना आढळतात.

५) दुपारच्या जेवणानंतर (छे. ते कंपनी देत नाही) बायकांसाठी ऑफिस कॅंटीनच्या जागेत कार्यक्रम आयोजित केले जातात. ते मला "हम आपके है कौन" ची आठवण करून देतात. कारण ते पुरुषांना बघायला सक्त मनाई असते. पुरुषांनी ऑफिसवेळेत काम करणे अपेक्षित असते.

६) कार्यक्रम धमाल असतात. बायकांच्या हसण्याखिदळण्याचे आवाज महिलादिनी काम करणाऱ्या दीनवाण्या पुरुषांच्या कानावर आदळत असतात. मध्येच टाळ्याचा कडकडाट ऐकू येतो. गेम्समध्ये जिंकलेल्या बायकांना बक्षीसे वाटली जात असतात. पाठोपाठ मचाक मचाक आवाज ऐकू येतो. सोबत दरवळणारा खमंग वास. संध्याकाळचे स्नॅक्स बायकांना फ्री असतात.

७) संध्याकाळी बायका जागेवर येतात ते कॉम्प्युटर शट डाऊन करून घरी जायला म्हणूनच..

या सर्वात पुरुष कुठेच नसतात!

त्यामुळे ते चिडतात. चरफडतात. जळतात..

पहिल्या वर्षी हे दु:ख पुरुषांनी हसत हसत पचवले.
पण हे दरवर्षीच घडू लागल्यावर तो अन्याय त्यांना खपवून घेता आला नाही.
आजच्या या पवित्र दिवशी आपल्या फेसबूक आणि व्हॉटसप स्टेटसवर स्त्रियांच्या महानतेचे गुणगाण गात आपल्या मैत्रीणींना ईम्प्रेस करणाऱ्या पुरुषांना आता मत्सराचा अग्नी जाळू लागला.

भराभर चक्रे हलली. टॉप मॅनेजमेंटला पुरुषांचीच मेजॉरीटी होती. त्यातल्या निम्म्या जणांची वृत्ती माजोरडी होती. बघता बघता महिलादिनाचे स्वरुप बदलून गेले. आता तो असा साजरा होतो.

१) फुल, पुष्पगुच्छ, फोटो, भेटवस्तू आणि दुपारनंतरचे कार्यक्रम नाहीसे झाले आहेत.

२) फुकटचा नाश्ता आता स्त्री-पुरुष दोघांनाही समसमान आणि जागेवरच मिळतो.

३) तो खाऊन पुरुष लागलीच मुंडी खाली घालून आपल्या कामाला लागतात.

४) बायका मात्र नवे नवे छान छान कपडे घालून येतात. आपले फोटो आपणच काढतात. दिवसभर हसत खिदळत राहतात.

५) काही बायका पुरुषांनी आमचे कार्यक्रम रद्द केले म्हणून त्यांच्यावर आगपाखड करतात. तर काही पुरुषांना बायकांचे हसणेखिदळणे आजही त्रास देते.

-------------------------------------

का माहीत नाही. पण हे सारे पाहिले की महिलादिनाच्या दिवशीच मला स्त्री-पुरुष मतभेद प्रकर्षाने जाणवतात!

-------------------------------------

तळटीप - लेखाचा जॉनर डार्क ललित लेख आहे. त्यामुळे जे लेखकाला सांगायचे आहे ते प्रत्येक स्त्री-पुरुषापर्यंत पोहोचेल याची खात्री नाही.

धन्यवाद,
ऋन्मेष
(एक बायका आवडणारा पुरुष)