वांगी भात

Submitted by लंपन on 25 May, 2022 - 09:06
प्रत्यक्षात लागणारा वेळ: 
२० मिनिटे
लागणारे जिन्नस: 

दीड वाटी आंबेमोहोर किंवा कोणताही वासाचा तांदूळ
वांगी 3 ते ४ मध्यम आकाराची फोडी करून
लवंग (2), नागकेशर (एक टी स्पून), जिरे (1 टे स्पून) , धणे (१ १/२ टे स्पून), सुके खोबरे किस (३-४ टे स्पून), चक्रीफुल (१). हे जिन्नस मंद आचेवर भाजून ह्याचा बारीक कोरडा मसाला करावा.
गोड दही  - १ टे स्पून
काश्मिरी लाल तिखट -१ टे स्पून  
चिंच गूळ पातळ कोळ- पाव वाटी
आधणाच पाणी -४ वाट्या
तूप - १ टे स्पून
मीठ चवीनुसार
फोडणीसाठी तेल, मोहरी, हळद, हिंग, कढीपत्ता, 2 हिरवी वेलची, दालचिनीचे 2 तुकडे.

क्रमवार पाककृती: 

प्रथम तांदूळ धुवून घ्या, पूर्ण पाणी निथळून घ्या. आता तांदळाला १ टे स्पून तूप लावा आणि १० मिनिट तसेच ठेवा. कुकरमध्ये फोडणीच्या साहित्याची फोडणी करा, त्यात वर केलेला कोरडा मसाला, लाल तिखट घाला आणि त्यात वांग्याच्या फोडी घाला. थोडे परतून घ्या आणि त्यात चिंचेचा कोळ घाला. आता त्यात तांदूळ घाला आणि मीठ घाला. 2 मिनिट परतले की त्यात गोड दही घाला. अजून एक मिनिट परतून त्यात पाणी ओता. आधण असल्याने लगेच उकळी येईल, उकळी आली की कुकरचे झाकण लावा (पाणी थोडे कमी पण चालेल जर भात फडफडीत हवा असेल तर). ३ शिट्ट्या काढा, वांगी भात तयार.

Vangi Bhat 2.jpg

वाढणी/प्रमाण: 
२-३ जणांसाठी
अधिक टिपा: 

लाल तिखटा ऐवजी एक / दोन हिरवी मिरची आणि थोडी कोथिंबीर ह्याचं वाटण घालू शकता. दह्याची चव भातात आवडत नसेल तर दही स्कीप करू शकता.

डाळ वांगी भाजी करताना वरचाच कोरडा मसाला वापरतात (लवंग, चक्रीफुल, नागकेशर, वेलदोडे आणि दालचिनी वगळून), नेहेमीच्या फोडणीत वांग्याच्या फोडी घालायच्या, कोळ घालायचा, कोरडा मसाला, लाल तिखट, मीठ घालायचं, वांगी जरा शिजली की त्यात शिजलेली तूर डाळ घालायची. आठ- दहा मिनिट वांगी शिजून घ्यायची. डाळ वांगी भाजी फार छान लागते चवीला.

माहितीचा स्रोत: 
पारंपारीक
आहार: 
शाकाहारी
पाककृती प्रकार: 
भाताचे प्रकार
प्रादेशिक: 
पारंपारीक मराठी
शब्दखुणा: 
वांगी भात
Groups audience: 
पाककृती आणि आहारशास्त्र
Group content visibility: 
Public - accessible to all site users
शेअर करा

इसे कहेते है अस्सल रेसेपी. १०० पैकी ५०० मार्क्स. काही मेंबर्स वांगी खात नसल्याने मटार किंवा तोंडली पर्याय म्हणून वापरेन.

लंपन, मी गोविंदभोग तांदुळ वापरु शकते का वासाच्या इतर तांदळा ऐवजी? कारण तांदूळ तर आला पण खिचडीचा मुहुर्त लागला नाही अजून.

जेम्स बाँड, आवरा. Proud इथे खिचडी पकेना, तुम्ही बाकी सरस बेत सांगताय.

Submitted by रश्मी. on 27 May, 2022 - 00:31

सीमा, रुन्मेष, अमा, झकोबा, जेम्स, अंजू, सुनिधी, भरत, ब्लॅक कॅट, किशोर, रश्मी खूप धन्यवाद. सीमा तो बघितला आहे भात गीताज किचन मधल्या मावशींनी आणि एक तामिळ भट म्हणून शेफ आहे त्याने केला होता, त्या मसाल्यात चणा अन उडीद डाळ, मिरी, मेथी दाणे, लाल मिरच्या अजून काय काय मसाले होते, तिखट होत असेल पण छान असेल चव ती पण. अमा, ती खोबरं हि मिरची चटणी की का को करू असे वाटत होते, उन्हाळा असल्याने का को केली. जेम्स, आता तुमच्या पद्धतीने झणझणीत करेन डाळ वांग पाऊस सुरू झाला की. ब्लॅक कॅट, मी अधिक टीपामध्ये ती रेसिपी दिली आहे. अंजू धन्यवाद, डाळिंबी भातात ओलं खोबरं, आलं, मिरी आवश्यक आहे, डाळींब्या खूप आवडतात पण भयानक पित्त चढते त्याने. Srd, सीमांनी उत्तर दिलंय. भरत, तो साऊथ स्टाईल वांगी भात आहे. झकोबा, आता नक्कीच काहीतरी प्लॅन करूया, आबाला पण यायचं आहे. रश्मी, गोविंदभोग गोड असतो चवीला, मी कधी हा भात केला नाही गोभो वापरून. तुम्ही गोभो पहिल्यांदा वापरत असाल तर आधी साधी गोडा मसाला घालून मूगडाळ खिचडी करा, पाणी थोडे जास्त घ्या मात्र. तांदूळ आणि मूगडाळ समप्रमाणात घ्या. एकदा गोभोची चव आणि पाण्याचा अंदाज आला की मग इतर भातासाठी वापरा.

Submitted by लंपन on 27 May, 2022 - 14:05

अंजू धन्यवाद, डाळिंबी भातात ओलं खोबरं, आलं, मिरी आवश्यक आहे, >>> सर्व अशा भातांवर ओलं खोबरं, कोथिंबीर घालते. आलं लिहायला विसरले पण आलं पर्सनली मला ज्यात त्यात आवडतं.

Submitted by अन्जू on 27 May, 2022 - 14:29

कशाची ताटाची? की एक चुटकी टूथपेस्टकी? ...
ताटाची माहिती नाही. लंपनच सांगू शकतील. बाकी तिरसट प्रतिसाद नाही. चांदी खरंच टूथपेस्टनी पटकन निघते, लख्ख निघते. जे.ना सांगतात टूथपेस्टने चांदी "झिजते" म्हणे. मी म्हणते थोडी परत विकायचं आहे ते ताट. चांदी विकायची वेळ यावी अशी भिकेची वेळ येणार नाही असा आशीर्वाद द्या की...

Submitted by Barcelona on 29 May, 2022 - 18:23

माझ्याकडे चांदीचा वाटी चमचा आहे.. मुलींच्या बारश्यात मिळालेला.. कधी कलरींग करताना त्यांना जर ती वाटी हाताला लागली की त्यातच त्या कलर मिक्स करतात.. मग ती वाटी मीही टूथपेस्टनेच धूते पण तशी चकाकी येत नाही .. लंपन यांचं ताट अगदीच चकचकीत आहे, नवंकोरं असल्यासारखं

Submitted by म्हाळसा on 29 May, 2022 - 18:31

अरे देवा!! ताट बघून तर मग त्यांना पिकासोच संचारायचा की.... कशाला किंमत विचारते आहेस?!!!
जाऊ दे, बरंच अवांतर झालं... निघते.

Submitted by Barcelona on 29 May, 2022 - 18:38

धनुडी, चनस, अदिती, प्राजक्ता, म्हाळसा, सीमंतिनी, सोनाली, देवकी आणि आरती. अदिती त्यात चिंच गूळ पण घातला का (मश्रुम म्हणून विचारत आहे)? म्हाळसा मस्तच दिसत आहे भात, त्यात चिंच नाही घातली का? म्हाळसा, किंमत किती इंची ताट आहे त्यावर अवलंबून आहे. हे जुने आहे ताट, त्यावेळी चांदी स्वस्त होती. आता 9 इंची साधारण 20 एक हजारला मिळेल. टूथपेस्ट ने घासली की निघतात स्वच्छ. पूर्ण वाळली की एअर टाईट प्लास्टिक पिशवीत ठेवायची. ओली असताना तशीच ठेवली आणि हवा लागली की काळी पडणार.

Submitted by लंपन on 5 June, 2022 - 09:03

. मग ती वाटी मीही टूथपेस्टनेच धूते पण तशी चकाकी येत नाही .. >> रुपेरी म्हणून एक लिक्विड मिळत त्याने चान्दीची भान्डी लखलख करतात.
चान्दी नाशिकहुन घ्या आमच्या, बेस्ट असते.

Submitted by प्राजक्ता on 5 June, 2022 - 23:14

Pages