गाथा

Submitted by अनन्त्_यात्री on 6 November, 2021 - 10:09

तुकारामाच्या गाथेने
जेव्हा पछाडले मला
तेव्हा ज्ञानोबा नावाचा
एक मांत्रिक शोधला

भ्रम रिंगण तोडून
ज्ञानोबाने केली शर्थ
कानामध्ये सांगितला
गहनाचा गूढ अर्थ

त्याची बहीण मुक्ताई
होती मांत्रिकांची माय
सूर्य गिळण्या ही मुंगी
पार आकाशात जाय

"गाथा बुडवून टाक"
मला मुक्ताई दटावे
गाथा तरंगून येते
अंतर्यामी तिला ठावे

गाथा वज्रलेप होते
गाथा रक्तात भिनते
शब्द रोकडे बोलता
पुन्हा पुन्हा पछाडते

विषय: 
काव्यलेखन
Groups audience: 
गुलमोहर - कविता
Group content visibility: 
Use group defaults
शेअर करा