ओल्या काजूगरांची परतून भाजी (कोरडी)

ओले काजूगर म्हणजे काजूच्या ओल्या/हिरव्या बिया सोलून आतले काढलेले गर. हे ताजे याच सीझनमध्ये मिळतात. कोकणात मिळतातच. पण मला यावर्षी चक्क बंगळूरला मिळाले. दापोलीहून थेट पार्सल! ते वाळवलेले आणि त्यामुळे टिकाऊ आहेत. पण तरीही धीर न निघाल्यामुळे आज पार्सल मिळाल्यामिळाल्या लग्गेच भाजी केली.
त्यांनी पाकिटाबरोबर दिलेल्या सूचनांनुसार उकळत्या पाण्यात ते काजूगर अर्धापाऊण तास भिजवून ठेवले. जरी ताजे, ओले असतील तरी गरम पाण्यात घालून ठेवणं अत्यंत आवश्यक आहे कारण त्यांना चीक असतो, तो निघाला पाहिजे.
भिजलेले काजूगर सोलून घेतले.

बटाट्याच्या काचऱ्या चिरून घेतल्या.
फोडणी करून त्यात कढीलिंब, हिरवी मिरची घातली आणि आधी बटाट्याच्या फोडी घातल्या. त्या परतून शिजत आल्यावर काजूगर घातले. थोडा वेळ परतून झाकण ठेवून एक वाफ काढली, मीठ घातलं. झाली भाजी. खूप शिजवायची नाही. वरून सढळ हस्ते ओला नारळ 'मस्ट' आहे. कोथिंबीर असल्यास तीही घालावी.
ही भाजी पोळीबरोबर, ताकभाताबरोबर छान लागते. नुसतीही खायला छान लागते. नुसते सोललेले काजूगरही तसेच खायला छान लागतात. सोलता सोलता एकीकडे खाल्ले जातातच.