कशाला सांगता आहात त्याला ही अशी आहे

Submitted by सुप्रिया जाधव. on 10 November, 2020 - 10:19

मला माझ्याहुनीही जाणतो तो की कशी आहे
कशाला सांगता आहात त्याला ही अशी आहे

कधी वटपौर्णिमा असते कधी धरते निरंकारी
नको मागूस काही आजही एकादशी आहे

तुझ्या गरजा तुझ्या इच्छाच शिरसावंद्य मानाव्या ?
तिच्या ती व्यक्त करते फक्त अन पडते फशी आहे

तिच्या लवचीकतेची थोरवी ती काय वर्णावी ?
भुकेला माय असणारी, निजेला उर्वशी आहे

नसेना का जगाला, प्रश्न तो इतका गहन नाही
तिची किंमत तिलासुद्धा कुठे रे फारशी आहे

तिचे ते हुंदके दबके तिचे ते कोरडे डोळे
पुराव्याला तुझ्यापाशी तुझी ओली उशी आहे

स्वतःच्या जन्मदात्याच्या घरी ठरते सदा उपरी
मुलांना जन्म देते त्या घरीही कसनुशी आहे

सुप्रिया मिलिंद जाधव

विषय: 
लेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा

आवडली. छान आहे Happy
तिची किंमत तिलासुद्धा कुठे रे फारशी आहे.. Sad

Submitted by अस्मिता. on 10 November, 2020 - 19:04

सुप्रिया ताई तुम्ही एकमेव आहात ज्यांच्या काही गझल/ कविता माझ्या निवडक दहात आहेत.

जास्त कळत नाही पण तुमच्या बऱ्याच कविता/गझल मनाला भिडतात हे नक्की.

Submitted by VB on 28 November, 2020 - 18:05

गझल सौन्दर्य काही कळत नाही पण हीचा अर्थ कुठेतरी आतपर्यंत पोचला.
स्वतःच्या जन्मदात्याच्या घरी ठरते सदा उपरी
मुलांना जन्म देते त्या घरीही कसनुशी आहे >>> अगदी अगदी

Submitted by वर्णिता on 29 November, 2020 - 06:44