बदलायला नको का?

Submitted by निशिकांत on 15 October, 2020 - 11:53

( तरही गझल. मतल्याचा सानी मिसरा प्रसिध्द गझलकार श्री भूषण कटककर "बेफिकीर" यांचा. )

तिज दार मंदिराचे उघडायला नको का?
काळानुसार आपण बदलायला नको का?

पत्नीमुळेच दरवळ अन् जीवनात हिरवळ
हे गूज लाडकीला सांगायला नको का?

लिहिण्या जहाल वास्तव काव्यातुनी कवींनी
प्राजक्त, प्रेम, तारे वगळायला नको का?

जर भेटले कुणी तर, का मख्ख लिफ्ट मध्ये?
पंख्याकडेच बघता, बोलायला नको का?

बाजार मांडलेला ज्यांनी रुढी, प्रथांचा
त्यांना विवस्त्र करुनी मिरवायला नको का?

जो चेहरेच दावी, लपवीत वास्तवाला
तो आरसा कधी तर भंगायला नको का?

म्हणतील काय सारे, याची सदैव चिंता
अपुल्या मनाप्रमाणे, बहकायला नको का?

बस एक बाळ झाले, माता पित्यास वाटे
भाऊ, बहीण दुसरी खेळायला नको का?

"निशिकांत" प्राक्तनाला ललकारुनी जगावे
मानेवरील जोखड फेकायला नको का?

निशिकांत देशपांडे. मो.क्र. ९८९०७ ९९०
वृत्त--आनंदकंद
लगावली--गागाल गाल गागा X२

विषय: 
काव्यलेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा