व्हॅक्युम क्लीनर घ्यावा की नाही? घ्यावा तर कोणता?

अखंड बालपण झाडू मारण्यात गेले आहे. ती सुद्धा खास आमची कोकणातली झाडू. दर गणपतीला न चुकता खाजे आणि लाडूंसोबत झाडूही गावातून घेऊन यायचो. व्हॅकुम क्लीनर वगैरे हे आमच्याकडे मोठ्या लोकांचे फॅड (चोचले) समजले जायचे. गेले चार वर्षे मोठ्या घरात राहूनही ते केवळ भाड्याचे आहे म्हणून व्हॅक्युम क्लीनर घ्यायचा कधी विचारही केला नाही. जो आता नवीन घरात करत आहोत.

तर नवीन गाडी घेताना जसे सेकंडहॅण्ड वा साध्या गाडीवर हात साफ करावा तसे आधी साधाच घेऊ म्हटले. त्या हिशोबाने युरेका फोर्ब्सच्या वेबसाईटवर एक साडेचार (कि साडेपाच?) हजाराचा चेक केला. Forbes quick clean DX vacuum cleaner (वरचा फोटो याचाच)

जमलं तर जमलं नाहीतर गेले पैसे निर्वातात असे समजून घ्यायचा ठरवले. तोच बायकोचे कोणीतरी कान भरले, भाई लेना है तो अच्छाही लेना है... वरना अच्छाही लेना है

झालं ! आज एक माणूस आमच्या घरात १५ हजार २९० रुपयांच्या व्हॅक्युम क्लीनरचा डेमो देऊन गेला. Euro clean WD X2 Vacuum Cleaner
सोफ्यातील कचरा, कीबोर्डमधील धूळ, घरात सांडलेले (त्यानेच सांडवलेले) पाणी, भिंतीवरची जळमटे, छतावरचा पंखा, अगदी मच्छरजाळीही छान साफ करून दाखवली.

भाई लेना है तो अच्छाही लेना है मधील "अच्छा" हाच यावर आमच्या घरात एक मताने शिक्कामोर्तब झाले. (ते एक मत अर्थात माझ्या बायकोचेच)

पण हा वॅक्युम क्लीनर सर्वात पहिले माझा खिसा साफ करणार असल्याने म्हटले चार जाणकार लोकांकडे चौकशी करूया. म्हणून हा धागाप्रपंच !

धन्यवाद ईन ॲडव्हान्स

१) व्हॅक्युम क्लीनरबाबत सर्वात पहिला जो बदनामीकारक मजकूर वाचनात येतो तो म्हणजे नव्याचे नऊ दिवस. त्यानंतर तो घरात पडून राहतो.
हे खरे आहे का? असल्यास तो घरात पडून राहणारा व्हॅक्युम क्लीनर वरीलपैकी पाचसहा हजारावाला असतो की पंधरा हजारावाला? की दोन्ही?
आधीच वर्षानुवर्षे काही फूड प्रोसेसर, टोस्टर, ज्युसर वगैरे मशीनी घरात पडून आहेत. त्यात भर नकोय.

२) घरगुती वापरासाठी खरेच महागडा व्हॅक्युम क्लीनर घेणे गरजेचा असतो का साधाही चालतो? कि तो पंधरा हजारावाला जो मला महागडा वाटतोय तोच साधा वा नॉर्मल आहे?

३) वॅक्युम क्लीनर २०-२५ वर्षे चालेल असे मोठ्या उत्साहात तो डेमोमॅन म्हणाला खरे. पण खरेच ईतका काळ टिकतो का? की न वापरल्याने अडगळीत जातो आणि म्हणून टिकतो?

४) वॅक्युम क्लीनर घरकामाला येणारया आंटीला वापरायला द्यावा का? की त्यांचे झाडू पोछा त्यांना करू द्यावे आणि आपण अध्येमध्ये सुट्टीच्या दिवशी तो बाहेर काढून घर साफ करून घ्यावे?

५) घराचा स्वच्छ्ता ईंडेक्स उत्तम राखायला वॅक्युम क्लीनर वापराची साधारण वारंवारता काय असते? काय असावी? दर आठवड्याला, दोन आठवड्यांनी, महिन्याला, सणासुदीला वगैरे...

६) वॅक्युम क्लीनर वापराचे काही साईड ईफेक्ट आहेत का? जसे की घरात कचरा करायची टेंडेंन्सी वाढते वगैरे. लाईक, होऊ दे कचरा. वॅक्युम क्लीनर आहे घरचा.

तुर्तास ईतकेच. ईतर शंका प्रतिसादात (कोणी सिरीअस्स्ली दिल्यास (आणि ते प्लीज द्या)) मिटवतो.