सोळा आण्याच्या गोष्टी - 'सावली' - रागिणी

हो ! माझं नावच आहे ते ... सावली. कारण मला स्वतंत्र अस्तित्व कधीच नव्हते आणि कदाचित पुढेही नसणार. तरीही मी जगतेय अन् जगत आलीय. तसं माझं वय फार नाही पण लोक म्हणतात की मी यंदा ७२ वर्षाची झालेय. अजुन किती काळ जगणार माहीत नाही पण ही आजुबाजूची मंडळी माझी इतकी काळजी घेत असतात की मला तर कधीकधी वाटून जाते मी अमर होणार. माझंसुद्धा सर्वांवर सारखेपणाने लक्ष असतं बरं का ! मी नाही कधी जातपात मानत, त्यामुळे भेदभाव करायला कधी जमलाच नाही. शेवटी भूक सर्वाना सारखीच असते ना ! कोणाची अन्नाची, पैशाची तर कोणाची वासनेची. जी रूपं घेऊन येईल तिची मी सावली... मालकाच्या भावनेवर विसंबलेली !!