राजरस्त्याचा कशाने बोळ होतो ?

या गैरसमजांनीच सगळा घोळ होतो
नाते उसवते आणि बट्टयाबोळ होतो

फुटणार असते तांबडे मिनिटात काही
दाटून येते मळभ अन झाकोळ होतो

उपकार मानूया मनोमन घसरणीचे ?
एकेक थेंबाचा नवा ओहोळ होतो

आल्हाददायी भासते सर विस्मृतीची
वादळ स्मृतींचे घेरते, कल्लोळ होतो !

उद्ध्वस्त होण्याची मिळे घाऊक शिक्षा
प्रेमात पडण्याचा गुन्हा किरकोळ होतो

जुंपून टाका बैल घाण्याला मनाचा
मोकाट सुटल्यावर अनावर पोळ होतो

गल्लीत शिरताना तुझ्या हा प्रश्न पडला
की राजरस्त्याचा कशाने बोळ होतो ?

सुप्रिया