एक रिकामेपण हाताशी उरले आहे

Submitted by बेफ़िकीर on 17 March, 2016 - 12:54

सारे काही अज्ञातात विखुरले आहे
एक रिकामेपण हाताशी उरले आहे

अगम्य माझी मनस्थिती ही पाहिलीस का?
तुझा विषय नसलेले काही स्फुरले आहे

तितक्यावर तर हजार गालिब झाले असते
तुझ्या नि माझ्यामध्ये जितके उरले आहे

डोळ्यांमध्ये काही केल्या येईना ते
कुठेतरी खात्रीने पाणी मुरले आहे

आठवले तर ठीक, न आठवले तर उत्तम
कोणासाठी युगे युगे मन झुरले आहे

ओठ म्हणाले होते 'आता सर्व थांबवू'
डोळे सांगत होते 'मी आतुरले आहे'

ऐकवायला बसलो तर संपेल जन्म हा
मनात जे मी खूप खोलवर पुरले आहे

फार दिवस 'बेफिकीर' होणे जमले नाही
नवीन काहीतरी इथे अंकुरले आहे

-'बेफिकीर'!

विषय: 
काव्यलेखन
शब्दखुणा: 
एक रिकामेपण हाताशी उरले आहे
Groups audience: 
गुलमोहर - गझल
Group content visibility: 
Public - accessible to all site users
शेअर करा

तितक्यावर तर हजार गालिब झाले असते
तुझ्या नि माझ्यामध्ये जितके उरले आहे>>>व्वा व्वा
अप्रतिम!
बाकी सर्वच शेर एकापेक्षा एक सरस ,,,,!

गजल आवडली.

Submitted by vilasrao on 17 March, 2016 - 20:36

ऐकवायला बसलो तर संपेल जन्म हा
मनात जे मी खूप खोलवर पुरले आहे

फार दिवस 'बेफिकीर' होणे जमले नाही
नवीन काहीतरी इथे अंकुरले आहे

खुप सुंदर..

Submitted by बी.एस. on 18 March, 2016 - 03:53

>>>अगम्य माझी मनस्थिती ही पाहिलीस का?तुझा विषय नसलेले काही स्फुरले आहे>>>क्या बात है!

>>>डोळ्यांमध्ये काही केल्या येईना ते
कुठेतरी खात्रीने पाणी मुरले आहे>>>वाह् व्वा!

>>>आठवले तर ठीक, न आठवले तर उत्तम
कोणासाठी युगे युगे मन झुरले आहे>>>मस्त,बढिया!

हजार गालिब आणि मक्ताही खासंच!
'ऐकवायला बसलो तर...' हा जरा विधानात्मक झाल्यासारखा वाटला मला!(तीट)

धन्यवाद!

(अवांतर—वाट पहायला लावलीत ब्वा नविन गझलेसाठी!)

Submitted by सत्यजित... on 19 March, 2016 - 08:23

_/\_

Submitted by जयदीप. on 19 March, 2016 - 23:01