माँ - सीमंतिनी - मलाही कोतबो

माँ
माझी समस्या गंभीर आहे तेव्हा धाग्यावर कृपया आपली बहिण समजून मार्गदर्शन करा. मी माँsssss आहे आणि (सिनेम्याच्या बजेटमध्ये एवढीच अक्षरे बसत असल्याने) माझा रक्तगट 'आरएच' आहे. अमर, अकबर आणि अँथनी ह्या तीन तरुणांचे रक्त मी पेट्रोल जसे टाकीतून गाडीत टाकतात तसे थेट स्वीकारले आहे. पण ती माझी समस्या नाही कारण पुढे अख्खा सिनेमा मी एचआयव्ही पॉझीटिव्ह किंवा इतर कुठला आजार न होता जगले. अर्थात एवढा एकच वैद्यकीय नियम मी धाब्यावर बसवलेला नाही. मला फक्त नवरासमोर असला की टिबी होतो किंवा तसा चेहरा होतो (अर्थात माझा नवरा ही असा आहे - मुले “हमने दो दिनसे खाना नही खाया” म्हणतात तर तो त्यांना खेळायला बॅट देतो. टिबी चेहऱ्याशिवाय मी दुसरे काय करणार?) माझा टि.बी. औषधाशिवाय जातो. कोर्नियल ट्रान्सप्लांट किंवा मोतीबिंदू अशा शस्त्रक्रिया मला लागत नाहीत. लोडशेडींग असल्यासारखी माझी आंखो की रोशनी जाते आणि येते. त्याप्रोसेस मध्ये रेल्वेतील सर्व भिक्षेकरी लोकांसाठी "शिर्डीवाले साईबाबा" ह्या गाण्याची सोय मी केली. नशीब तरी कसं असत बघा तीन मुलगे मला पण एकाला पण सुलोचनाबाईंसारख ‘तुम हाथ मुंह धो लो’ सांगायची संधी मिळाली नाही. मला गाजर का हलवा बनवण्याची संधी मिळाली नाही की माझा एक पण मुलगा बी.ए पास होऊन आला नाही. पण पदरी पडल आणि पवित्र झाल म्हणून मी मुलांना फुले, गजरे देण्यात मी सिनेमा घालवला. पण ती पण माझी समस्या नाही.
नुकताच मला 'मदर्स डे' ला एन्डेजर्ड कॅरेक्टर हा किताब देण्यात आला. हल्ली पाठक भगिनींनी एम्पवर्ड मां (जाने तू या जानेना, नवा खुबसूरत, वेक अप सिड आणि राम लीला असले अनेक सिनेमे) बनून माझ्यासारख्या अभागी दुखियारी अबला मां लोकांची स्पिशीज, जी मी आणि करण-अर्जुनच्या आईने वाढवली होती ती स्पिशीज, धोक्यात आणली आहे. खूप दडपण येते. मला सुचत नाही मी काय करू?
आपला प्रतिसाद मला खालील बाबतीत हवा आहे:
​१. मला एन्डेजर्ड कॅरेक्टर म्हणून देण्यात येणारा किताब मी स्वीकारावा का? का नवीन माँ विरोधी निषेधपत्रक काढावे?
२. मुलांच असल तरी रक्तच ते- ह्या वयात रक्तगट आणि एचआयव्हीची तपासणी करावी का?
३. संजय लीला भन्साळीने रिमेक बनवायला घेतला तर जॉब सिक्युरिटीसाठी फ्लोरीस्ताचे ट्रेनिंग घ्यावे का स्पर्शमधील शबानाप्रमाणे ब्रेल शिकावी?
४. ‘शिर्डीवाले साईबाबा’ म्हणणाऱ्या भिक्षेकर्यांसाठी खास असा एखादा रिमिक्स मिकासिंगला करावयाला सांगू का? का योयो हनीसिंघला शोधू? ​