जरा जराश्या नविन

जरा जराश्या

होत्या जरा जराश्या संवेदना उराशी
केला करार होता माझ्याच जाणिवांशी

जगतो सुखात आहे ना वानवा कशाची
प्रत्येक शब्द खोटा हा बोललो तुझ्याशी

ती रीत पूर्वजांची मी पाळतोच आहे
बघ पूर आसवांचे मी रोखले स्वतःशी

वस्तीत भय कशाचे आश्वासने मिळाली
नुकताच भेटलो मी रस्त्यात सज्जनांशी

जिंकू तरी कसा मी शस्त्रे तुझ्याच हाती
हा डाव एकतर्फी हरलोच प्राक्तनाशी

त्यांचेच लाड केले तडजोड ना कधीही
आता न बंध उरला बेबंद भावनांशी

माझेच आप्त होते केलेत वार ज्यांनी
नाराजगी कशी मग धरणार आसवांशी?

हटकून जे मिळाले ते दुखः प्यार आहे
जमलेत सूत आता सगळ्याच वेदनांशी

घरट्यात या उन्हाच्या मी घेतला विसावा
झगडून फार थकलो या क्रूर सावल्यांशी

-योगिता पाटील