प्रवेशिका - ४४ ( kaartaa - वाट इतकी पाहिली... )

मित्रहो, कार्यशाळेत गझल प्रकाशित होण्याचा आज शेवटचा दिवस.
आजही तुम्ही नेहमीप्रमाणे गुणांकन करायचं आहेच.
भारतीय प्रमाणवेळेनुसार १९ ऑक्टोबर रोजी सकाळी ९ वाजेपर्यंत तुम्ही गुणांकन करू शकता.

वाट इतकी पाहिली, स्वप्नात अवतरलीच नाही
एकदा रुसली सखी जी - ती पुन्हा हसलीच नाही

वेचतो आहे कशाला, पारिजाताचा सडा मी?
बावलेली रातराणी - जर पुन्हा खुललीच नाही

मैफलीमध्ये तुझ्या, बेभान होउन गायलो पण-
भैरवी तू गायलेली - हाय ओळखलीच नाही

वाट पायी अडखळे जी, दोष तिज देऊ कशाला ?
मी उभा जवळीच होतो - ती कधी वळलीच नाही

तीच माझी शायरी अन, काव्य सारे तीच आहे
शायरी मी गायलेली - पण तिला कळलीच नाही

जीवनाची लक्तरे मी, आज कवटाळू कशाला?
जर कधी ती लक्तरे पाहून - कळवळलीच नाही

नाव स्मरतो जर तुझे, तर दूर मी जाऊ कशाला?
भेटशिलही तू अजूनी - आस ही हरलीच नाही