पुरणपोळी पण तेलावरची.

दोनेक महिन्यापुर्वी ईथे विचारले होते तेलपोळी विषयी.. त्या बीबी वर मी पा.कृ देते असा रि. दिला आणी विसरुन गेले. ह्या वेळी संक्रांतीला काही कारणाने करता नाही आली पुपो. मग ४-५ दिवसांनी खावीशी वाटु लागली.
पुपो ती पण तेलावरची करताना खुप काळजी घ्यावी लागते. एकतर ती भरपुर तेल (पचपच असा आवाज येईपर्यंत तेल) यावर पुपो न पलटता पोळपाट फिरवुन लाटावी लागते हलक्या हाताने. आज्जी दरवेळी मी पुपो लाटताना म्हणायची "पोरगी पहावी व्हटात, आणी पोळी पाहावी काठात".. तर अशी ही पुपो नाजुक, हलक्या हाताने, एकाच दिशेत लाटणं फिरवुन लाटावी लागते.
मग सकाळी डाळ + गुळ शिजत घातले.
क्रमवार कृती खालीलप्रमाणे.

पुरणः
साहित्यः- २ वाटी हरभरयाची डाळ, पावकिलो ला जरा कमी असा गुळ (ढेकळे फोडुन) ( चवीनुसार गोड कमी-जास्त करु शकता) , वेलची पावडर (ऑप्शनल), चिमुट भर मीठ.
कृती:-
एका जाड बुडाच्या भांड्यात डाळ शिजु शकेल ईतके म्हणजे डाळीच्या लेवलच्या ४ बोटं वर असे पाणी गरम करत ठेवल. पाण्याला उकळी आली की डाळ पाण्यात टाकली. मीठ टाका. परत एकदा सरसरुन उकळी आणुन गॅस बारीक करुन ठेवला. भांड्यावर तिरके झाकण टाकुन ठेवले. १०-१५ मि, नंतर पळीने डाळ चाचपुन बघितली. हातात फुटली की समजावे की डाळ शिजली आहे.

मग गॅस बंद करावा. ताट भांड्यावर झाकुन (वेळुन) पाणी एका भांड्यात काढुन ठेवा हे पाणी कटाच्या आमटीला लागते.

पाणी पूर्ण काढुन घ्यावे नाहीतर पुरण पातळ होते. आता डाळीच भांडं परत गॅसवर ठेवुन गुळ अ‍ॅड करा. गुळाचे पाणी सुटेल त्यात डाळ पूर्णपणे शिजुन जाईल. जरा मिश्रण हाटलुन घ्या. गॅस मोठा करुन गुळाचा रस आटु द्या..

तेलाच्या पोळीला जेवढे स्मुथ पुरण तेवढी पोळी सुकुमार होते. आईकडे पुरण दगडी पाट्यावर होते अजुनही. ईथेही पाटा आहे पण बाकी कामं असल्याने मी मिक्सरचा आधार घेतला( आणी ईथेच चुकलो.. मिक्सरवर काल माझे पुरण पाट्यायेवढे फाईन झालेले नाहीये त्यामुळे जरा मुड गेला माझा पुपोचा.. )
तर मुद्दा काय की जेवढे फाईन पुरण तेवढे पुपो फाईन..

आता पुपोची कणीकः-
साहित्यः-
१ १/२ वा टी गव्हाचे पीठ, पाऊण वाटी मैदा, मीठ, पाणी.
कृती:-
मैदा, गव्हाचे पीठ चाळुन घेऊन मीठ टाका. थोडे थोडे पाणी टाकत कणीक मळुन घ्या. पण ही कणीक रेगुलर चपातीच्या कणीकीपेक्षा मऊ पाहिजे. गरज पडली तर तेलाचा हात घेऊन कणीक चरचरुन मळुन घ्या. नंतर पाणतुटी करुन घ्या. तयार कणीकेला तेलाचा १ चमचा घेऊन तेल मुरेपर्यंत मळा.

आता पुपोची तयारी.
१. पोळपाट -लाटणे कोरडे करुन तेल लावुन घ्या. पुर्ण पोळपाटाला तेल लावायचे आहे. आणी लाटण्याला सुद्दा..
२. तवा मागच्या साईडनी ठेवायचा आहे त्याला पण उपड्या बाजुन तेल लावुन घ्या.
तेलावर हात जरा जास्तच असावा..

पुरणपोळी कृती:-
१. हाताला तेल लावुन छोटासा कणीकेचा गोळा करुन घ्या. तो हातावरच पसरत पसरत म्हणजे कडेने पुरी येवढ्या आकारत करुन घ्या.

२. आता पुरणाचा छोटासा गोळा करुन लांबट आकाराचा , तो हळु हळु कणीकीच्या गोळ्यात भरायचा. हात फिरवत फिरवत मोदकासारखे साईडची कणीक वरतुन आणुन गोळा बंद कराय्चा.

३. आता दोन्ही हाताने हलकेसे दाबत गोळा चपटा करुन तेल लावलेल्या पोळपाटावर मध्यभागी तेलाची धार सोडुन गोळा हाताने थपथपा . ह्यामुळे पुरण सगळीकडे व्यवस्थित पसरते. तोंड बंद केलेली गोळ्याची बाजु खाली गेली पाहिजे.

४. तेल लावलेले लाटणे एका दिशेने फिरवत पोळी लाटा. पोळी लाटताना पोळपाट फिरवा. आणी काठात लाटा.

५. गोलाकार पोळी झाल्यावर लाटणे पोळीच्या समोरील कडेवर ठेवा. काटाने अलगद उचलुन पोळी लाटण्यावर रोल करा. हे लाटणे हळुवार फिरवत आतल्या साईडने पुर्ण पोळी लाटण्यावर घ्या. दुसरा काठ अधांतरीच ठेवा नाही तर पोळी तव्यावर सुटी करताना चिकटेल.

६. तवा चांगला तापला आहे याची खात्री करा पोळी असलेले लाटणं अलगद तव्यावर पोळी सोडली जाईल ह्या बेताने बाहेरच्या बाजुला फिरवत आणा.

७. पुपो टम टमीत पुरी सारखी फुगली की साईडला होल करुन हवा जाऊ द्यावी नाहीतर वाफ हातावर येते. पुपो भाजली की तव्यावरुन घसरायला लागते कधीकधी तेव्हा ही सुध्दा काळजी घ्या.
८. एक साईड भाजली की पोळी परतुन टाका. तेलाचा हलका-सा हात लावा. परत परता आणी चांगली भाजुन घ्या दोन्ही साईडनी.
९. आई खाली सुती कापड अंथरुन त्या वर पोळ्या निम्या एकावर एक रहतील अश्या टाकते. म्हणजे गरम पण राहतात पण चिकटत नाहीत.
हो परतायला मी स्टील्चे ऊलथंणे वापरलेय पण आई-आज्जी हातानेच उलथवतात. पुपो च्या कणीकेत बिब्बा टाकुन ठेवते आई-आज्जी. का माहित नाही.

पुरणपोळी बरोबर कटाची आमटी मस्ट.

गरम गरम पुपो, कटाची कट असलेली तिखट तिखट आमटी, बटाट्याची भाजी, कुरडई,, ,..... बस्स अजुन काय
पाहिजे. पप्पा पोळी गरम दुधाबरोबर खातात तसेही चांगले लागते. पण पुपो आमटीत बुड वुन खाली पुरण जाऊन बसते ती आम टी अहाहा..

तर मग या जेवायला..