तू दिलेले.....

तू दिलेले प्रेम म्हणजे भास होता शेवटी !
छानशी सुरवात आणी त्रास होता शेवटी !

तू दिलेला हा दुरावा आपलासा वाटला
तोच केवळ एक माझा खास होता शेवटी !

तू दिलेली साथ सुटली..आजही नाही पटत
बोललो नव्हतो तरी विश्वास होता शेवटी !

तू दिलेले पत्रही हमखास गंधाळायचे
अक्षरांना वेदनेचा वास होता शेवटी !

तू दिलेले गीत मी गातो अताशा एकटा
द्वंद्वगीताचाच तो आभास होता शेवटी !

तू दिलेल्या आठवांना आजही सांभाळतो
गुंतला प्रत्येक माझा श्वास होता शेवटी !

तू दिलेला शब्द होता तूच नाही पाळला
तो तुझा त्रागा विनासायास होता..शेवटी!

तू दिलेले सर्व काही तू म्हणावे 'आपले'
हीच वेडी आस, माझा ध्यास होता शेवटी !

- नानुभाऊ