सायकल कुठली घ्यावी...???

कॉलेजची वर्षे संपून जवळ जवळ एक तप संपले. कॉलेज जीवनाच्या काही आठवणी धूसर झाल्या तश्याच आपण एकेकाळी सगळीकडे सायकलनी जात होतो याची जाणीवदेखील पुसट झाली. आणि इतक्या वर्षांनी पुन्हा एकदा सायकल चालवण्याच्या इच्छेने उसळी घेतली.
सायकल चालवल्याने फिटनेसपण राहील, सुटलेले पोट कमी होईल आणि पेट्रोलचा खर्चही वाचेल असा तिहेरी हेतू मनाशी बाळगत सायकलच्या दुकानात पोहचलो. जरी कॉलेज संपून १०-१२ वर्षे झाली असली अजूनही मन त्याच काळात होते. त्यामुळे मस्तपैकी २-३ हजार घालून एक चांगल्यातली सायकल घ्यावी असे म्हणतोय तोच पहिल्या सायकलने दणका दिला.
किंमत १२,०००.
"साहेब ही पहा लेटेस्ट सायकल, २१ गियर्सवाली, एकदम लाईटवेट, डिस्कब्रेक, दणकट बॉडी. "
दुकानदार मला कसोशीनी पटवून सांगायचा प्रयत्न करत होता. मी आपला धक्क्यातून बाहेर आलोच नव्हतो.
अगदी बेसिक रेंजमध्ये नाहीये का काही.
"बेसिक रेंजमध्ये ही पहा ८,७०० ची. पण ही थोडी जइ आहे आणि सहाच गियर आहेत. "
याही पेक्षा स्वस्तातली काही नाही का. मला अगदी साधी सायकल हवीये म्हणल्यावर त्याचा चेहरा उतरला.
"आजकाल कुणीच साध्या सायकल वापरत नाही साहेब. तुम्हाला सायकल कामासाठी वापरायची आहे का फिटनेससाठी...?"
"अर्थात फिटनेससाठी."
मग म्हणाला थोडे पैसे जास्त टाका आणि चांगल्यातली घ्या. साध्या सायकलीपण आता ४-५ हजारला मिळतात. पण तुम्हाला त्यात आनंद नाही मिळाला तर पडून राहणार. बघा पटतयं का...

त्याच्या बोलण्यावर मी पण विचार केला. नंतर येऊन नेटवर पण बराच सर्च केला आणि गोंधळात पडलो. मला कुणी सांगू शकेल का मला कुठली सायकल चालू शकेल.
माझ्या गरजा पुढीलप्रमाणे -
१. खूप वर्षे झाली आहेत सायकल चालवून आणि आता आळस मुरलाय अंगात. इथल्या इथे जाताना पण गाडी वापरण्याची सवय. त्यामुळे मोटीव्हेट करणारी पाहिजे.
२. जास्त वेग किंवा जास्त दणकटपणा नकोय कारण जास्त करून शहरातच चालवली जाणार. त्यामुळे माऊंटन बाईक्स आऊट ऑफ क्वेश्चन..(पण त्या सायकली दिसतात मस्त..बघूनच घ्यायचा मोह होतो)
३. कॅरीयर पाहिजे. या परदेशी बनावटीच्या सायकलींना कॅरीयर नसतेच. मोटोक्रॉस बाईकसारखे मडगार्ड फक्त.
४. शक्य तितकी वजनाने हलकी आणि कमीत कमी मेंटेनन्स ठेवावा लागेल अशी.
५. बजेट आता थोडे वाढवावेच लागणार आहे पण शक्यतो ८-९ हजारच्या पुढे नको. नाहीतर मग सायकलसकट घराबाहेर पडावे लागेल.

माबोवर कुणी आहेत का अशा सायकली चालवणारे. किंवा सायकल ग्रुप वगैरे??