कोडे......

कोडे......

"शी बाई आई, कसली ही अळी
अंगभर केस नि किती वळवळी"

"हा तर सुरवंट दिसतो जरी कुरुप..
होईल एक गंमत, बदलेल हा रुप.."

"रुप कसे बदलेल याचे गं आई ?
नकटे माझे नाक, कधी अस्से होईल का बाई..?"

"गंमत तर पुढे पाहशील खरी....
जेव्हा हा कोषात आपले घर करी...
अंगाभोवती विणेल हा कोष
करील आराम नि लांबलचक झोप...
झोपेतून हा बाहेर येईल जेव्हा
कित्ती गोड फुलपाखरु टाळ्या पिटशील तेव्हा.."

"काही ही सांगतेस लहान मी म्हणून..
असली घाण अळी येईल फुलपाखरु होऊन ...?"

"हो गं राणू माझी, अशीच होते गंमत
सुरवंटाचे रुप टाकून फुलपाखरु येई तरंगत...
धीर धर जरा, लक्ष ठेव कोषाकडे
तुझे तुला कळेल फुलपाखराचे कोडे.."

"कशाला आई थांबूया एव्हढे ?
गुगल सोडवेल ना लगेच हे कोडे..."