भाग २- मध्ययुगातले गावः किर्केल, जर्मनी (फोटोज आणि व्हिडिओजसहित)

भाग १ येथे पाहता येईल.
---------------------------------------------

नमस्कार लोकहो!

२ वर्षांपूर्वी जेंव्हा मी पहिल्यांदा जर्मनीतील किर्केल गावी दरवर्षी मे महिन्यात दोन दिवस भरणार्‍या मध्ययुगीन गावाचे/ बाजाराचे (ज्याला जर्मन भाषेत मिटलआल्टरमार्क्ट असे म्हणतात) छोटेखानी प्रदर्शन पहायला गेले होते, तेंव्हा आम्हाला तिथे पोहोचायला फार उशीर झाला होता. त्यामुळे त्यावेळी फक्त निवडक फोटो काढले गेले होते. जे मी भाग १ मध्ये टाकले आहेत. मागच्या वर्षी आम्ही गेलो, तेंव्हाचे काढलेले फोटो काही केल्या सापडले नाहीत, फक्त एक व्हिडिओ मात्र मिळाला, त्याचीही लिंक भाग १ मध्ये दिली आहेच. ह्या वर्षी जायचे की नाही, हे काहीच ठरवले नव्हते, पण मायबोलीवर मागच्या भागाच्यावेळी सगळ्यांनी दिलेल्या प्रोत्साहनामुळे आणि या विषयात दाखवलेल्या उत्साहपूर्ण अभिरुचीमुळेच केवळ या वर्षी या मध्ययुगीन गावात जायचे ठरवले.

मध्ययुगातील लोक कसा पेहराव करत, कशी भांडी वापरत, कसे दागिने घालत, थंडीपासून कसे संरक्षण करत, राजघराण्यातील लोकांचे पेहराव, स्वसंरक्षणासाठी बनवलेली शस्त्रे, लोहारकाम, सुतारकाम इ. गोष्टींची माहिती सर्वांना व्हावी यानिमित्ताने एक छोटेसे प्रदर्शन जर्मनीत वेगवेगळ्या गावांमध्ये भरवले जाते. ११ वर्षांपूर्वी ही परंपरा सुरु झाली आणि आजपावेतो जोपासली गेलेली आहे. या प्रदर्शनाचे वैशिष्ट्य म्हणजे हे प्रदर्शन पाहायला जाणारे बरेचसे लोक आधीच्या वर्षीच्या प्रदर्शनातून (किंवा जिथे कुठे मिळत असतील तिथून) विकत घेतलेले पोषाख आणि दागिने घालूनच प्रदर्शन बघायला येतात. यात लहान मुलांचाही अपवाद नाहीच. त्यामुळे आपण खरोखर मध्ययुगीन गावात वावरत आहोत, असा भास होत राहतो. ह्या परंपरेचे मुख्य आकर्षण म्हणजे पारंपारिक कपडे आणि दागिने घालून काही ललना करतात तो बेली डान्स.

ह्या दोन दिवसांच्या मध्ययुगीन गाव/ बाजार/ प्रदर्शनाचे उद्घाटन शनिवारी (२१ मे २०११) दुपारी फायर शो ने झाले. पण आम्ही रविवारी दुपारीच जाऊ शकलो असल्याने, त्याचे फोटो नाहीत. गेल्या १५-२० दिवसांपासून येथे जाण्याचे केलेले प्लॅनिंगपण फसणार अशी चिन्हे रविवारी दुपारी पडणार्‍या पावसामुळे दिसायला लागली होती. हा उन्हाळ्याचा ऋतू असल्याने पाऊस पडेल, असा विचारही कधी मनात आला नव्हता, पण मग हवामानाचा अंदाज पाहिला, तर दुपारी वीजा कडकडून पाऊस पडणार आणि संध्याकाळी ६ नंतर हवामान पूर्ववत होणार असे भाकित केलेले दिसले. ६ नंतर म्हणजे हे मार्केट बंद होणार आणि आपण ते मिसणार याची जवळ जवळ खात्रीच झाली. त्यानुसार पाऊस सुरुही झाला आणि थांबायची चिन्हे दिसेनात. निराश मनाला बाजूला सारून काहीही झाले तरीही हे मिशन यशस्वी करायचेच, ह्या निर्धाराने आम्ही किर्केलला गेलो. आम्ही पोहोचलो, तेंव्हा मात्र मस्त ऊन पडलेले होते त्यामुळे आमच्या आशा पुन्हा पल्लवीत झाल्या.

१. किर्केल येथे ह्या बुरुजाच्या पायथ्याशीच हा बाजार वसवलेला होता.

२. इथे गाडी पार्क करुन मार्केटच्या दिशेने निघालो.

३. हा फोटो मिटेलआल्टरमार्क्टची दिशा दर्शवणारा:

४. पार्किंगपासून किर्केलच्या बुरुजाच्या पायथ्याशी पोहोचण्यासाठी अंदाजे पाऊण ते एक कि.मी. चा चढ चढावा लागतो. तोच हा चढः

५. एवढा चढ चढूनही काही चेहरे आनंदी होते, याचा अर्थ हा बाजार पाहण्याचा उत्साह त्यांच्या आविर्भावात दिसतोय, नाही का? :

६. गेल्यावेळीप्रमाणेच ह्या ही वेळी प्रवेश द्वारापाशी किरकोळ शुल्क भरुन तिकिट म्हणून असा शिक्का हातावर मारुन आम्ही मार्केटजवळ पोहोचलो.

७. भरपूर गर्दी होतीच आमच्यासोबतीला:

८. आत हे असे निरनिराळे स्टॉल्स लागलेले होते, ज्यात जुन्या काळातल्या वस्तुंचे प्रदर्शन मांडलेले होते:

स्टॉल क्र. १: शस्त्रास्त्रे

स्टॉल क्र. २: शस्त्रास्त्रे

स्टॉल क्र. ३: शस्त्रास्त्रे

स्टॉल क्र. ४: शस्त्रास्त्रे

स्टॉल क्र. ५: सुगंधी साबण

स्टॉल क्र. ६: खाण्याचे पदार्थ. यात साखरेच्या पाकात तळलेले केळ्याचे गोलाकार काप, हॅसेलनट, चेरी इ. अनेक सुखामेव्याच्या प्रकारांचा समावेश होता.

स्टॉल क्र. ७: भांडी

स्टॉल क्र. ८: दागिने, वनस्पती आणि वनौषधी

स्टॉल क्र. ९: दागिने

स्टॉल क्र. १०: राजेशाही पोषाखः

स्टॉल क्र. ११: साधे पोषाखः

स्टॉल क्र. १२: दिसायला दिसतात साधे, पण किंमती तर गगनाला भिडलेल्या... किंमतीचे लेबल दर्शवतेय पोषाखाची किंमत ६९ €:

९. स्टॉल्स बघत चालत असतांनाच मागच्याच वर्षीप्रमाणे हे घुबड आमच्या स्वागताला रस्त्याच्या बाजूला उभे होते. ते घुबड आणि त्याची मालकीण एकदमच एकमेकांना शोभणार्‍या. तीक्ष्ण नजर आणि धारदार नाकः

१०. मध्ययुगीन काळात कडाक्याच्या थंडीपासून संरक्षण करत झोपणे म्हणजे तारेवरची कसरतच, हा पहा त्याचा नमुना:
१.

२.

११. त्या काळातली स्वयंपाकाची पद्धतः
१.

१२. त्या काळातली लोहारकामाची पद्धतः फोटो आणि फोटोखालीच आहे व्हिडिओ लिंकः

आणि हा लोहारकामाचा व्हिडिओ:
http://www.youtube.com/watch?v=JEyi8GWvci8

१३: हे आहे सुतारकाम. त्याचा फोटो आणि खालोखाल व्हिडिओ:

आणि हा सुतारकामाचा व्हिडिओ:
http://www.youtube.com/watch?v=m4TG3XmsIvg

१४. सुतारकामाच्या ह्या व्हिडिओमध्ये जंगली पक्ष्यांच्या कर्णकर्कश्य किंकाळ्यांचा आवाज येतोय ना? तो आवाज चक्क एक माणूस काढतोय, जीभेवर विशिष्ट प्रकारची शिट्टी त्याने लपवली आहे. त्याचाही व्हिडिओ पाहता येईलः
http://www.youtube.com/watch?v=JZvutZd0uGw

१५. फिरुन फिरुन दमलात? मग हा आहे खादाडीचा एक स्टॉलः हे आहेत सॉसेजेस, ज्याला जर्मनमध्ये वुर्स्ट म्हणतात....

१६. आम्ही बरेचसे फोटो काढेपर्यंत निसर्गाने आम्हाला साथ दिली पण बेली डान्सचे फोटो काढून व्हिडिओ शूट करायला सुरुवात करताच अचानक मेघ दाटून आले आणि ५-१० मिनिटे जोरदार पाऊस पडला. त्यामुळे बेली डान्स करणार्‍या ललनांना म्युझिशियन्ससाठी बनवलेल्या स्टेजचा आसरा घ्यावा लागला. तेंव्हा मोबाईलला पाण्यापासून वाचवत काढलेला हा व्हिडिओ:
http://www.youtube.com/watch?v=r1rnUL2ZScQ

१७. ह्या व्हिडिओत काही लोक जर्मन मध्ये गात आहेत, "वियर वोलेन, वियर वोलेन फ्राई बियर" म्हणजेच आम्हाला हवी, आम्हाला हवी फुकटची बियर" .... एवढे दिवसभर वाद्य वाजवून, गाऊन आणि नाचून, थोडक्यात आपले मनोरंजन करुन दमल्यावर ते एवढी तरी किमान अपेक्षा करणारच ना? आणि अर्थातच त्यांना आयोजकांकडून "फ्राई बियर" पुरवली गेलीच...

ती श्रमपरिहाराची बियर पितांनाचे ते कलाकारः

आणि पावसापूर्वी काढलेले बेली डान्सचे हे दोन फोटोज:

१.

२.

त्यानंतर पाऊस संपला, त्या कलाकारांची बियर पिऊन झाली. पण तो डान्स काही पुन्हा सुरु झाला नाही.

१८. परतीच्या वाटेवर....

मायबोलीकरांच्या अधिक सविस्तर माहिती आणि फोटोंच्या मागणीचा यथाशक्ती पुरवठा करण्याचा हा प्रयत्न. आशा आहे, मायबोलीकरांना आवडला असेलच. तुम्हा सर्वांच्या प्रतिसादांच्या प्रतिक्षेत....

धन्यवाद!