उंट जिराफ जिगरी दोस्त

उंट जिराफ जिगरी दोस्त
फोटो काढू म्हणाले मस्त -
फोटो काढला हसरा छान
अडकून बसली मानेत मान !

कांगारू म्हणाले पिल्लाला
चल रे जाऊ फिरायला -
पिल्लू बसले ऐटीत
आईच्या पोटाच्या पिशवीत !

मोकळी हवा घेण्यासाठी
मासा पाण्याबाहेर आला -
बगळा स्वागत करण्यासाठी
एका पायावर तयार झाला !

ससोबा रॉकेटमध्ये बसून
पृथ्वीभवती गरगर फिरले -
ढगांचा गडगडाट ऐकून
चांदोबाच्या कुशीत शिरले !

आरडा ओरडा करता करता
मुंगीचा बसला हो घसा -
आवाज तिचा आपल्याला
आता ऐकू येईल कसा ?