१ जुडी तांबडा माठ
१ ते २ कांदे
२ ते ३ टेबलस्पून मुगाची डाळ (किमान अर्धा तास अगोदर भिजवून)
३ ते ४ टेबलस्पून नारळाचे दूध
२-३ लसणाच्या पाकळ्या
आल्याचा तुकडा
मीठ
गूळ
फोडणीसाठी तेल
वाटण :
भाजलेले तीळ, किंचित शेकलेले जिरे-धणे, मिरची व कोथिंबीर वाटून घ्यावेत.
माठाची पाने निवडून, स्वच्छ धुवून, चिरून घ्यावीत. कांदा बारीक चिरावा. फोडणीसाठी कढई/ पॅनमध्ये तेल गरम करून त्यात कांदा परतून घ्यावा. त्यात वाटण, लसूण पाकळ्या व आल्याचा तुकडा घालून परतावे. माठाची चिरलेली पाने, मीठ घालून ते परतावे. मुगाची डाळ घालून परतून घ्यावी. गूळ घालावा. भाजी शिजत आली की वरून नारळाचे दूध घालून ते सुकेपर्यंत भाजी परतावी.
१. मूळ कृतीत गूळ नाही. आवडत नसल्यास घालू नये. मी घातला आहे.
२. नारळाचे दूध अजून जास्त घालू शकता. भाजी अगदी पूर्ण सुकेपर्यंत न परतता ओलसर ठेवूनही चांगली लागते.
३. ह्याच पध्दतीने मेथी, पालक यांच्या पालेभाज्याही करता येतात.
४. मूग डाळ, नारळाचे दूध, तीळ इत्यादींमुळे ह्या भाजीला एक प्रकारचा मऊसूत पोत येतो.
तांदळाच्या भाकरीबरोबर छान
तांदळाच्या भाकरीबरोबर छान लागेल. आमच्याकडे हे पुस्तक, मुळ आवृतीमधले होते.
दिनेशदा, माझ्याकडे सध्या त्या
दिनेशदा, माझ्याकडे सध्या त्या पुस्तकाची १९ वी आवृत्ती आहे!!!
ही भाजी पोळीबरोबरही चांगली लागली. वाटण लावून माठासारखी पालेभाजी करता येते हेच मला नवीन! त्यामुळे चव कशी असेल ह्याबद्दल जरा धाकधूकच वाटत होती. पण छान लागते ही भाजी, सो नो प्रॉब्लेम!